Altaı qazaqtary Astana turǵyndaryn qala kúnimen quttyqtady
ASTANA. QazAqparat - RF Altaı respýblıkasynyń Qosaǵash aýdany ártisteri Astanadaǵy L.Gýmılev atyndaǵy EUÝ-de qala kúnine arnap, merekelik kontsert berdi.
«Astanalyqtardy quttyqtaý úshin biz Altaıdan arnaıy keldik. Ártisterimiz negizinen aýdan jastarynyń shyǵarmashylyq ujymdarynan quralǵan. Keshke barlyq tilek bildirýshilerdi shaqyrdyq», - dedi Qosaǵash aýdanynyń basshysy Áýelhan Jatqanbaı.
Aýdan basshysynyń aıtýynsha, Qosaǵashta qazir on myńǵa jýyq qazaq turady. Onda qazaq mádenı ortalyǵy jumys isteıdi.
«Biz barlyq ulttyq merekelerdi atap ótemiz. Qazaq mádenı ortalyǵynyń jumysy men jergilikti bıliktiń qoldaýy arqasynda ózimizdiń salt-dástúrimizdi, tilimiz ben dinimizdi saqtap otyrmyz. Búginde aýdandaǵy árbir qazaq aýylynda meshit pen mektepter bar», - dedi altaılyq delegatsııa basshysy.
Kontsertti ýnıversıtet stýdentteri men oqytýshylary, qala turǵyndary tamashalady. Shyǵarmashylyq ujym elordalyqtardy altaılyq avtorlardyń ár jyldardaǵy ulttyq saz-áýenderimen sýsyndatty.
