Altaı qalasynda 1 maýsymnan bastap ystyq sý berý toqtatylady
ÓSKEMEN. KAZINFORM – Shyǵys Qazaqstan oblysyndaǵy Altaı qalasynda 1 maýsymnan bastap ystyq sý bolmaıdy.
Altaı aýdanynda aýa temperatýrasynyń jylynýyna baılanysty 27 sáýirden bastap jylytý maýsymy aıaqtalady. Kelesi qysqy maýsymǵa jylý jelileri men jabdyqtardy sapaly daıyndaý maqsatynda ystyq sýmen jabdyqtaýdy josparly túrde óshirý kestesi bekitilgen.
Altaı qalasynda ystyq sý berý 1 maýsym men 30 tamyz aralyǵynda toqtatylady. Al Jańa Buqtyrma kentinde josparly óshirý 1 tamyzdan 25 tamyzǵa deıin júrgiziledi.
– Sonymen qatar Jańa Buqtyrma turǵyndaryna kentte jylýmen jabdyqtaý jelilerin qaıta jańǵyrtý boıynsha tıisti jumystar jalǵasyp jatqany eskertildi. Osyǵan baılanysty jaz mezgilinde qurylys-montaj jumystary úshin kórsetilgen kesteden tys qosymsha ýaqytsha ystyq sý óshirýleri bolýy múmkin, - dep habarlady aýdan ákimdiginen.
Eske salsaq, osyǵan deıin Semeıde alǵash ret 685 úıge ystyq sý berilgeni habarlanǵan.
