Altaı aımaǵy – adamzattyń shańǵy tebýi alǵash bastalǵan jerlerdiń biri - sheteldegi qazaq baspasózi
Mońǵolııa Túrkııaǵa kıiz úı men et ónimderin jiberdi – «Kaznews»
Mońǵolııa Úkimeti tarapynan Hataı qalasyndaǵy zilzaladan zardap shekkenderge kómek qolyn sozý úshin 20 kıiz úı, 1500 kórpe, 10 tonna et ónimderi, 2 tonna sham jibergen bolatyn, dep habarlaıdy Mońǵolııanyń «Kaznews» aqparattyq portaly.
Atalǵan BAQ-tyń málimetinshe, Túrik jurtyna kómek retinde jiberilgen mońǵol kıiz úıleri tıelgen júk kóligi Hataı qalasyna jetken.
Altaı aımaǵy ― adamzattyń shańǵy tebýi alǵash bastalǵan jerlerdiń biri –People.cn
Qytaıdyń soltústik-batysyndaǵy Shyńjań Uıǵyr avtonomııalyq ólkesi Altaı aımaǵy ― adamzattyń shańǵy tebýi alǵash bastalǵan jerlerdiń biri. Shańǵy tebý ǵasyrlar boıy osy aımaqtaǵy turǵyndardyń eń basty saltynyń birine aınaldy, dep habarlaıdy Qytaıdyń «People.cn» aqparattyq portaly.
Atalǵan basylymnyń málimetinshe, Altaıda turatyn qytaılyq jergilikti halyqtar ― urpaqtar boıy qoldanyp kelgen ań men mal terisinen daıyndalǵan dástúrli shańǵyny jasaýǵa sheber. Olardyń atasy da, ákesi de shańǵy teýip ósken, ol uldaryna da osy dástúrli ónerdi úıretip keledi.
«Ań terisinen jasalǵan dástúrli shańǵynyń ereksheligine tamsanǵyńyz kelse, onda vıdeony basyńyz», dep jazady qytaılyq BAQ.
Bul vıdeoda qar shańǵynyń qalaı jasalatyny týraly jergilikti Shyǵys esimdi turǵyn túsindirgen.
Sondaı-aq, Shyǵystyń úsh balasynyń úlkeni Meıirbek qar shańǵy jarysynda memleket boıynsha birinshi bolǵany aıtylǵan.
Qazaqstandaǵy ázerbaıjan dıasporasynan Túrkııaǵa kıiz úı– «TRT»
Túrik álemi Túrkııadaǵy zilzaladan zardap shekkenderge kómek jiberýdi jalǵastyrýda. Qazaqstanda turatyn ázerbaıjandyqtar Ortalyq Azııaǵa ǵana tán kıiz úıdi Túrkııaǵa jiberedi.
Bul týraly osy aptada Túrkııa Radıo Televızııa portaly habarlady.
Túrkııalyq BAQ-tyń málimetinshe, epıtsentri Kahramanmarash bolǵan jer silkinisterinen keıin aımaqqa kómekter jalǵasýda. Barshasy osy aımaqtaǵy apattyń zardabyn jeńildetýge tyrysyp jatyr. Apattyń alǵashqy kúninen bastap túrik áleminiń de qoldaýy zor bolǵan. Qazaqstandaǵy ázerbaıjan dıasporasy da óz arasynda kómek jınapty. Jınalǵan somaǵa qazaqtyń ulttyq kıiz úıi satyp alynǵan.
Qazaqstandaǵy Ázerbaıjan dıasporasynyń basshysy Ábilfas Hamedov Qazaqstandaǵy 200 myń ázerbaıjandyqtyń atynan túrkııalyqtarǵa kóńil aıtqan.
Qytaı-Qazaqstan shekarasyndaǵy «Baqty» ótkelinde saýda qaıta bastaldy - People.cn
20 aqpannan bastap «Baqty» ótkeli Qytaı-Qazaqstan shekarasyndaǵy ortaq bazar - Jibek jolynyń mádenı taýar qalasy óz jumysyn qaıta bastady, dep habarlaıdy «Halyq» gazeti.
Atalǵan basylymnyń dereginshe, Tarbaǵataıdaǵy «Baqty» keden beketi - memlekettik birinshi dárejeli shekara beketi. Ol Tarbaǵataı aımaǵynyń ortalyǵy Sháýeshek qalasynan nebári 12 shaqyrym jerde ornalasqan. Jibek jolynyń mádenı taýar qalasy - Qazaqstandyq taýarlar men syrtqy saýda ónimderiniń kórmesin, kelissózderin, saýdasyn jáne elektrondy kommertsııasyn biriktiretin zamanaýı saýda platformasy.
«Munda ekspress-logıstıka, tamaqtaný jáne oıyn-saýyq, iskerlik kelissózder jáne jyljymaıtyn múlikti basqarý aımaǵy, ózara kómek tobynyń esep aıyrysý jáne taýarlardy satyp alýdy deklaratsııalaý ortalyǵy bar», dep jazady qytaılyq basylym.
Sonymen qatar, osy aptada «People.cn» aqparattyq portalynda «Qazaqstan arpasyn tıegen poıyz Tszıansıge jetti» degen aqparat jaryq kórdi.
Atalǵan BAQ-tyń keltirgen deregine súıensek, 17 aqpan kúni Ganchjoý halyqaralyq qurlyq portyna 130 tonna qazaqstandyq arpany tıegen «Jańa Jibek joly» nómirli Ortalyq Azııa poıyzy kelip toqtady. Jetkizilgen arpa budan soń Ganchjoýdaǵy bıotehnologııalyq kompanııanyń óndiristik zaýytyna jiberiledi.
Sondaı-aq, Ortalyq Azııa poıyzy Qazaqstannyń Aqmola oblysynan jolǵa shyǵyp, Shyńjańdaǵy Alashankoý keden beketi arqyly Qytaıǵa kirgennen keıin, Ganchjoý halyqaralyq qurlyq portyna jetti. Sapar 20 kúnge sozyldy.
Qytaılyq basylymnyń dereginshe, Qazaqstandyq arpanyń sapasy jaqsy, baǵasy da tómen. Ónimniń ózindik qunyn tıimdi tómendetýge múmkindiktiń bolýy, kásiporyndar arasynda arpanyń tanymaldyǵyn arttyrǵan.
Aıta keteıik, ótken jyldan bastap Qytaıǵa qaıtatyn poıyzdarmen tasymaldaý kórsetkishterin zerttegende, olardyń zaýyty Ortalyq Azııanyń «Jańa Jibek joly» nómirli poıyzy arqyly quny shamamen 19 mıllıon ıýan bolatyn 7100 tonnadan astam qazaqstandyq arpany ımporttaǵan.
Iran men Qazaqstannyń yntymaqtastyǵyn keńeıtý kerek – «Parstoday»
Qazaqstannyń Mańǵystaý oblysy men Irannyń Gúlistan oblysynyń ekonomıkalyq delegatsııalarynyń ortaq otyrysynda ekijaqty yntymaqtastyqty keńeıtý keregi aıtyldy, dep habarlaıdy «Parstoday» aqparat agenttigi.
Atalǵan aqparat agenttiktiń habarlaýynsha, Mańǵystaý oblysynyń saýda delegatsııasy Irannyń Gúlistan oblysy men Qazaqstan arasynda ekonomıkalyq baılanysty damytý áleýetterin qarastyrý maqsatynda sársenbi kúni Gorgan áýejaıy arqyly Gúlistan oblysyna keldi.
Gúlistan oblysy ákiminiń ekonomıkalyq ister jónindegi orynbasary Muhammed Dehnavı sársenbi kúni keshke Gorganda Mańǵystaý saýda-ekonomıkalyq delegatsııasy jáne Gúlistannyń atqarýshy organ basshylary men ekonomıkalyq belsendileri arasyndaǵy otyrysta sóz sóılegen. Ol óz sózinde, Gorganda 7 myńnan asa qazaqtyń ómir súrýi Gúlistan oblysy men Qazaqstan respýblıkasynyń tarıhı baılanysynyń belgisi ekenin tilge tıek etken.
Onyń aıtýynsha, Qazaqstan delegatsııasy Gúlistan oblysynyń aýyl sharýashylyǵy jáne balyq ónerkásibindegi tájirıbesi men áleýetterine qyzyǵýshylyq tanytty. Ekikúndik saparda osy máseleler tereń talqylandy.
Mańǵystaý oblysy ákiminiń ekonomıkalyq ister jónindegi orynbasary Qanat Quljanov qazaqtardyń jemis-jıdek pen kókónis ósirý jáne qurylys materıaldaryn shyǵarý salasyna ınvestıtsııa salýǵa qyzyǵatynyn aıtqan.
Tashkentte halyqaralyq marafon ótedi - «ÓzA»
2023 jyldyń 12 naýryzynda Tashkent qalasynda «V International Tashkent Marathon» marafony jáne respýblıkanyń 13 oblysynda «Jańa tynys» júgirý jarysy ótedi.
Jarysta 42 shaqyrymdyq klassıkalyq marafon, 21 shaqyrymdyq jartylaı marafon, sondaı-aq 3 jáne 10 shaqyrymdyq jappaı júgirýden turady, oǵan áýesqoılarmen qatar kásipqoı sportshylar da qatysa alady.
Bul týraly osy aptada ózbekstandyq «ÓzA» aqparattyq agenttigi habarlady.
Atalǵan BAQ-tyń dereginshe, marafon jáne jartylaı marafon qashyqtyqqa 18 jasqa tolǵan azamattarǵa qatysýǵa ruqsat etilgeni, sońǵy eki qashyqtyqqa qatysý úshin jas shekteýi joq. Jeńimpazdar aqshalaı syılyqtarmen marapattalady. Jalpy júlde qory 259 mıllıon 720 myń sýmdy quraıdy.
