Altaı aýdanynyń tusynda Buqtyrma ózeninde seń júrýde
ÓSKEMEN. QazAqparat – Shyǵys Qazaqstan oblysynyń ózenderinde muz erip, sý deńgeıi kóterilip keledi, dep habarlaıdy QazAqparat.
ShQO TJD baspasóz qyzmetiniń málimetine súıensek, kúnniń kúrt jylynýyna baılanysty óńirdegi ózenderde muz erip, sý deńgeıi kóterilgen. Qazirde Buqtyrma ózeninen seń kóship, Altaı aýdanynyń tusynda júrýde. Biraq muz juqa bolǵandyqtan eldi mekenderdi sý basý qaýpi joq. Mamandar bekitilgen ýchaskelerde kezekshilik uıymdastyryp, seńdi baqylaýda ustap otyr. Eger muz keptelip jatsa jarý jumystary qolǵa alynady.
«Katonqaraǵaı aýdany Aqsý aýylyndaǵy ózende muz kepteldi. Biraq ózdiginen sógilip, ózen arnasy sý basý qaýpinsiz tazartyldy. Qazirgi ýaqytta Korobıha jáne Sennoe aýyldaryndaǵy Buqtyrma ózeninde muz jarylýda», - dep habarlady vedomstvo ókilderi.
TJD dereginshe, bıyl oblys boıynsha jaýǵan qar mólsheri jyldyq normadan aıtarlyqtaı kóp bolǵan. Sý tasqynyn boldyrmaý úshin jergilikti atqarýshy organdar men qutqarýshylar turaqty monıtorıng júrgizýde.
