Altaı aýdanynda sý tasqyny jaǵdaıy turaqtaldy
ASTANA. KAZINFORM – Shyǵys Qazaqstan oblysyna qarasty Altaı aýdanynda táýlik boıy júrgizilgen sý tasqynynyń aldyn alý jumystarynyń nátıjesinde sý basqan barlyq turǵyn úı aýmaqtarynan sýdyń baǵyty buryldy.
«Barlyǵy 370 qap tóselip, 1 335 tonna ınertti materıal tógildi. Motopompalardyń kómegimen 27 800 tekshe metr sý soryldy. Jalpy, oblystyń ózenderindegi sý deńgeıi qaýipti belgiden aspaıdy», - dedi QR Tótenshe jaǵdaılar mınıstrliginiń ókili Asqar Shárip Ortalyq kommýnıkatsııalar alańynda ótken brıfıngte.
Belgili bolǵandaı, Atyraý oblysynda bógetterdi nyǵaıtý jumystary jalǵasyp jatyr. Sońǵy 5 kúnde Qulsary qalasynda 176 úıden sýdyń baǵyty burylyp, sý sorylǵan. Motopompalardyń jáne jyljymaly sorǵy stantsııalardyń kómegimen qalǵan 180 úıden sý sorý jumystary júrgizilýde. Mundaı jumystar Soltústik Qazaqstan oblysynyń Petropavl qalasy men Qyzyljar aýdanynda da jalǵasyp jatyr.
