Altaı Ábıbýllaev QR SІM júıesinde qalýy múmkin
ASTANA. QazAqparat - QR Syrtqy ister mınıstri Qaırat Ábdirahmanov Qazaqstannyń Polshadaǵy burynǵy Elshisi Altaı Ábıbýllaevqa qatysty máselege túsinik berdi, dep habarlaıdy QazAqparat.
«Máseleniń mán-jaıy sharýashylyq sýbektiniń kommertsııalyq qyzmetine aralasýǵa áreket jasaýǵa baılanysty bolyp otyr. Bolashaqta osy tektes jaǵdaılar qaıtalanbas úshin biz tıisti qorytyndy shyǵaryp, qajetti qadamdardy qabyldaımyz»,-dedi mınıstr Májilistegi Úkimet saǵatynan keıin.
Osy oraıda ol tıisti organdar tarapynan sotqa deıingi tergeý amaldary bolǵanyn jetkizdi.
«Bul rette tergeý amaldarynyń qupııalyǵy, kinásizdik prezýmptsııasy, sondaı-aq adamnyń abyroıy men adamgershiligi ustanymdary nazarda bolýy tıis»,-dedi Ábdirahmanov.
Sonymen qatar ol Syrtqy ister mınıstrligi Altaı Ábıbýllaevty syrtqy saıası vedomstvonyń júıesinde qaldyrýdy josparlap otyrǵandyǵyn atap ótti.
«Sońǵy 20 jylda onyń syrtqy saıası vedomstvo jumysyna qosqan úlesi men tájirıbesin eskere otyryp, SІM júıesinde qaldyrýdy josparlap otyrmyz. Atalǵan sheshimder men eńbek zańnamasyna sáıkes, Altaı Ábıbýllaevty jumyspen qamtýdyń túrli nusqalaryn qarastyrý úshin eshqandaı da kedergiler joq»,-dedi ol.
Buǵan deıin habarlanǵandaı, Astanada Memlekettik hatshy Gúlshara Ábdiqalyqovanyń tóraǵalyǵymen ótken Qazaqstan Respýblıkasynyń Prezıdenti janyndaǵy Sybaılas jemqorlyqqa qarsy is-qımyl máseleleri jónindegi komıssııa otyrysynda Qazaqstan Respýblıkasynyń Polshadaǵy Tótenshe jáne Ókiletti Elshisi A.Ábıbýllaevty memlekettik qyzmet týraly zańnamany buzǵany úshin tártiptik jaýapkershilikke tartý týraly másele qaralǵan bolatyn. Komıssııa otyrysynyń qorytyndysy boıynsha A.Ábıbýllaevqa qyzmetke sáıkestiginiń tolyq emestigi týraly eskertý túrindegi tártiptik jaza qoldaný jóninde Memleket basshysyna usynys engizýge sheshim qabyldandy.
QR Prezıdenti Nursultan Nazarbaevtyń Jarlyǵymen Altaı Ábıbýllaev Qazaqstan Respýblıkasynyń Polshadaǵy Tótenshe jáne ókiletti elshisi qyzmetinen bosatyldy.
