ALTAI FEST: polıtsııa 50 myńnan asa kórermenniń qaýipsizdigin qamtamasyz etti
ASTANA. KAZINFORM — Qatonqaraǵaı aýdanynda «Altaı — túrki áleminiń altyn besigi» halyqaralyq festıvali óz máresine jetti, dep habarlaıdy Polisia.kz.
Aýqymdy mádenı sharanyń shymyldyǵy Qazaqstannyń Halyq ártisi Dımash Qudaıbergenniń qatysýymen ótken gala-kontsertpen túıindeldi. Atalǵan sharaǵa Shyǵys Qazaqstan oblysynyń turǵyndarymen qatar, elimizdiń ózge óńirleri men shetelden kelgen 50 myńnan astam kórermen jınaldy.
Festıval kúnderi Shyǵys Qazaqstan oblysy polıtsııa departamentiniń qyzmetkerleri kúsheıtilgen rejımde qyzmet atqaryp, qoǵamdyq tártipti saqtaý jáne qatysýshylardyń qaýipsizdigin qamtamasyz etý baǵytynda jumys istedi.
Gala-kontsert ótetin kúni adamdar kóp jınalatyn oryndardaǵy qaýipsizdikke, jol qozǵalysyn uıymdastyrýǵa, kólik aǵynyn retteýge jáne azamattarǵa der kezinde kómek kórsetýge basa nazar aýdaryldy.
Festıval aýmaǵynda jaıaý jáne avtopatrýlder, jol-patrýldik polıtsııa qyzmetkerleri, sondaı-aq polıtsııanyń basqa da bólimsheleri jumyldyryldy.
— Іs-qımyldardy naqty úılestirý jáne barlyq qyzmetterdiń úılesimdi jumysynyń nátıjesinde kólik qozǵalysynyń kedergisiz ótýi, is-sharanyń qaýipsiz ári ondaǵan myń kórermenge qolaıly jaǵdaıda ótýi qamtamasyz etildi. Barlyq jaýapty qyzmettiń tıimdi ózara is-qımylynyń arqasynda ALTAI FEST halyqaralyq festıvali oqys oqıǵasyz aıaqtaldy. Bul óz kezeginde aýqymdy mádenı sharalardy ótkizý kezinde quqyqtyq tártipti qamtamasyz etýdiń joǵary deńgeıin taǵy bir márte dáleldedi, — delingen habarlamada.
Budan buryn Kazinform tilshisi Katonqaraǵaıǵa qalaı jetýge, qaıda barýǵa bolatyny jáne týrısterdi qyzyqtyratyn ózge de suraqtarǵa jaýap izdep kórdi.
