Alstom kompanııasy elimizde qandaı ınvestıtsııalyq jobalardy iske asyryp jatyr
ASTANA. KAZINFORM — Alstom kompanııasynyń Batys jáne Ortalyq Azııadaǵy basqarýshy dırektory Jerom Boıe QR Prezıdenti janyndaǵy sheteldik ınvestorlar keńesi otyrysynda ıvestıtsııalyq jobalardyń iske asý barysy jaıynda málimdedi.
— Bizdiń kompanııa — temirjol salasyndaǵy óndirýshi. Qazaqstanda 2010 jyldan beri jumys istep kelemiz. 2010-2023 jyldarda 200 mıllıon eýro ınvestıtsııa saldyq. 2023 jyly qosymsha 50 mıllıon eýro ınvestıtsııa qarastyrdyq. Ony 2027 jyldyń sońynda tolyqtaı berip bolamyz. Bul qarjy Astanada lokomotıv óndiretin zaýyt salýǵa jáne Qazaqstannyń ońtústik óńirlerindegi temirjol depolaryn damytýǵa jumsalyp jatyr. Túptep kelgende, bul jobalar Orta dáliz arqyly júk tasymalyna paıdasyn tıgizedi, — dedi ol keńestiń 38-shi plenarlyq otyrysy aldynda jýrnalısterge suhbat bere otyryp.
Sonymen qatar, Jerom Boıe jasandy ıntellektini engizý sharalaryna toqtaldy.
— Kompanııa jumysyna boljam jasaý jáne baǵalaý úshin jasandy ıntellektini barynsha keń aýqymda engizip, qoldanyp kelemiz. Júıemizde shaǵyn rekýrsıvti modelderdi júzege asyrýǵa tyrysyp jatyrmyz. Ony bizdiń Qazaqstandaǵy ınjenerlerimiz jasaǵan jáne sonyń arqasynda lokomotıvterge tıisti qyzmet kórsetip, qandaı da bir aqaý shyǵýynyń aldyn alamyz, — dedi ol.
Aıta keteıik, buǵan deıin EQDB Qazaqstan ekonomıkasyna 1,3 mlrd eýrodan astam ınvestıtsııa salýy múmkin ekenin jazǵanbyz.
