Álsirep qalǵan: Almaty oblysynda joǵalyp ketken balyqshy tabyldy

QONAEV. KAZINFORM — Almaty oblysynda eki kún buryn joǵalyp ketken balyqshy tabyldy. Tótenshe jaǵdaılar mınıstrliginiń málimetinshe, 8 maýsym kúni 77 jastaǵy er adam Balqash aýdany Qaraoı aýylynyń mańyndaǵy Іle ózenine balyq aýlaýǵa shyǵyp, qaıtyp úıine oralmaǵan. 

Birinshi bolyp balyqshynyń týystary dabyl qaǵyp, joǵalǵany týraly qutqarý qyzmetine júgingen. 

«Eki táýlik boıy qutqarýshylar ushqyshsyz ushý apparatynyń kómegimen azamat joǵalǵan jerden 7 shaqyrym radıýsta aerovızýaldy izdestirý júrgizdi», - dep habarlady TJM. 

Qaraoı aýylynan ońtústik-batys baǵytynda 30 shaqyrymnan astam joldy jaıaý patrýl aralady. Er adam ózen jaǵalaýynyn tabyldy. Ol ábden álsirep qalǵan.

«Balyqshynyń adasyp ketkeni anyqtaldy. Oqıǵa ornyna kelgen qutqarýshylar oǵan alǵashqy kómek kórsetip, eldi mekenge jetkizdi», - delingen habarlamada.

Eske salsaq, buǵan deıin Ertis ózenine shomylyp júrgen jas jigit sýǵa batyp ketkenin habarlaǵan edik.