Alpysty alqymdasa da qulaǵymen kir tasyn kóterip, kólik súıreıdi
TARAZ. QazAqparat - Jambyldaǵy qos qulaǵymen kir tasyn kóterip, kólik súıreıtin alpysty alqymdaǵan Qarataý turǵynynyń kúsh-qaıraty áli de sol qalpynda, dep habarlaıdy QazAqparat.
Qarataýda turatyn erekshe azamattyń «Qurysh qulaqty Berik» atanyp ketkenine az bolmaǵan. Onyń ózgeshe qabileti erterekte oıanǵanymen, osydan eki-úsh jyl buryn áleýmettik jelilerde qulaǵyna jip baılap, jeńil kólikti tartyp, 25-30 kelige deıingi aýyr salmaqtaǵy kir tastaryn kótergen beınejazbalar men fotosýretter taralǵan bolatyn. Sodan kóp uzamaı respýblıkalyq arnalarda túrli baǵdarlamalarǵa shaqyrtý alyp, qatysqan.
Búginde alpysty alqymdasa da Berik Ábilhanulynyń kúsh-qaıraty kemimegen. Qaıta jattyqqan saıyn óz-ózine degen senimdiligi arta túskendeı. Jýyrda erekshe qabilet ıesine habarlasyp, hal-jaǵdaıyn suraǵanymyzda ol únemi jattyǵyp júrgendikten qulaq shemirshekteri búginde odan ári qataıǵandyǵyn jetkizdi.
7 ul-qyzdyń ákesi, nemereleriniń atasy B.Pyshanov Qarataý qalalyq sport mektebinde shahmat jáne doıby oıyndary boıynsha bapker. Jubaıy Jaýhar mektepte dene shynyqtyrý páninen ustazdyq qyzmet jasaıdy.
Á degende tisimen 10 kelilik kir tasyn kóterip kórgen azamat, ýaqyt óte kele áýeli 16, sodan keıin 20 kelilik kir tastaryn qulaǵyna jip arqyly ilip kóterip jattyǵady. Bul ádisi iske asqan soń kóńili kólik tartyp kórýge aýa bastaıdy. Birde tasada turǵan «Jıgýlı» avtokóligin qulaǵyna jip ilip, tartyp kórgende kólik alǵa júrip ketpegenimen, ornynan qozǵalǵanyn ańǵarady.
«Keıin táýekelge bel býyp ákimshilik ǵımaratynyń aldynda jınalǵan jurtshylyqtyń kózinshe bir kólikti 3 metrge deıin qulaǵymmen súırep kórdim. Kópshilikpen qosa ózim de tań qaldym. Qazir 3-5 metrge deıin tarta beremin. Jattyǵýlardyń, daıyndyqtyń arqasynda osyndaı isti jasaı aldym»,-deıdi Berik Ábilhanuly. Jattyǵýdan soń qulaqtarynyń sál aýyrsynatynyn jasyrmaıdy. Búginde onyń bul ereksheligin on úsh jasar balasy meńgerýde.
Avtor: Ǵıbrat Sembaı
