Alpystan astam qulan «Іle-Balqash», «Altyn dala» rezervattaryna kóshirildi
ASTANA. KAZINFORM – Qulandar popýlıatsııasyn qalpyna keltirý baǵdarlamasy aıasynda 66 qulan «Іle-Balqash» jáne «Altyn Dala» rezervattaryna kóshirildi. Bul týraly Ekologııa jáne tabıǵı resýrstar mınıstri Erlan Nysanbaev aıtyp berdi.
– Janýarlardy kóshirý jáne olardyń beıimdelýi úshin qolaıly jaǵdaı jasaý – túrdi saqtap qalýǵa jáne Qazaqstannyń jazyq dalaly ekojúıesinde tabıǵı tepe-teńdikti qalpyna keltirýge yqpal etedi. Qazaqstan aýmaǵynda tolyǵymen joıylyp ketken qulandar 1950-60 jyldary Túrkimenstannan ákelingen 14 qulannyń kómegimen qaıta jandanyp, 4493-ke jetti, – dedi mınıstr Úkimet úıinde ótken baspasóz máslıhatynda.
Sonymen qatar Prezıdent tapsyrmasyn oryndaý maqsatynda kaspıı ıtbalyǵynyń popýlıatsııasyn saqtaý úshin bıylǵy qazan aıynda Úkimet qaýlysymen «Kaspıı ıtbalyǵy» tabıǵı rezervaty quryldy.
Budan basqa, jek dýadaq popýlıatsııasyn saqtap qalý jáne tabıǵı tirshilik etý ortasyna jiberý maqsatynda Birikken Arab Ámirlikterimen kelisim aıasynda Túrkistan oblysynda Jek dýadaqty qaıta ósirý ortalyǵy salyndy. 2009-2024 jyldar aralyǵynda 73 myńnan astam jek dýadaq tabıǵatqa jiberildi.
Buǵan deıin Erlan Nysanbaev Qazaqstanǵa Nıderlandydan jetkizilgen jolbarystardyń alǵashqy qysy qalaı ótip jatqanyn aıtyp berdi.
Sondaı-aq, aldaǵy bes jylda Eýropadan Qazaqstanǵa 40 Prjevalskıı jylqysy ákelinedi.
Budan bólek, Qazaqstannyń Qyzyl kitabyna taǵy 11 janýar túri engiziledi.