Alpıngradta jaraqat alǵan týrıst 3400 metr bıiktikten evakýatsııalandy

ASTANA. KAZINFORM – Alpıngrad taý bókterinde jaraqat alǵan týrıst 3400 metr bıiktikten evakýatsııalandy. Bul týraly QR Tótenshe jaǵdaılar mınıstrliginiń baspasóz qyzmeti habarlady.

15 shilde kúni qutqarýshylarǵa Almaty qalasynyń Medeý aýdanyndaǵy Alpıngrad taýly aımaǵynda bir azamattyń ózdiginen tómen túse almaı jatqany týraly habarlama kelip túsken. Er adamnyń aıaǵy qaıyrylyp ketken. Geolokatsııa naqty bolmaǵanymen, onymen baılanys úzilmegen.

- Іzdestirý-qutqarý operatsııasyn júrgizý úshin Tótenshe jaǵdaılar mınıstrligi Respýblıkalyq jedel-qutqarý jasaǵynyń jedel toby dereý oqıǵa ornyna shyqty. Qutqarýshylar Mynjylǵyǵa deıin 9 shaqyrym jol júrip, odan ári taýly jermen jaıaý kóterilýge májbúr boldy.

1996 jyly týǵan zardap shekken azamatqa alǵashqy medıtsınalyq kómek kórsetildi, - delingen aqparatta.

Qutqarý operatsııasy TJM qyzmetkerleriniń jedeldigi men kásibı áreketiniń arqasynda sátti aıaqtaldy. Týrıst 3400 metr bıiktikten aman-esen evakýatsııalandy.

Aıta keteıik, TJM órt sóndirýshileri saıajaı qoǵamyndaǵy jarylys qaýpiniń aldyn aldy.