Alpaýyt Nvidia kompanııasy mıllıardtaǵan dollar shyǵynǵa batýy múmkin
ASTANA. KAZINFORM – Qytaıǵa eksportqa qoıylǵan shekteýler Nvidia kompanııasyna mıllıardtaǵan dollar shyǵyn ákelmek, dep jazdy BBC.
Amerıkalyq mıkrochıp óndirýshi Nvidia Qytaıǵa eksport erejeleriniń qatańdaýyna baılanysty 5,5 mıllıard dollar kóleminde shyǵynǵa ushyraıtynyn retteýshi organdarǵa habarlady.
Jańa erejelerge sáıkes, jasandy ıntellekt tehnologııasynyń bastaýynda turǵan jáne álemdegi eń qymbat kompanııalardyń biri sanalatyn bul alpaýyt endi Qytaıǵa keńinen tanymal H20 chıpterin eksporttaý úshin arnaıy lıtsenzııa alýy kerek.
Ótken aptada AQSh bıligi chıpterdiń sýperkompıýterlerde paıdalanylýy múmkin degen alańdaýshylyqqa baılanysty lıtsenzııa qajet ekenin Nvidia-ǵa habarlaǵan. Bul týraly kompanııa AQSh-tyń Qor naryǵyn retteý komıssııasyna (SEC) málimdedi. Atalǵan talap belgisiz ýaqytqa deıin kúshinde bolmaq.
Nvidia chıpteri búkil álem boıynsha jasandy ıntellekt júıelerin oqytýda keńinen qoldanylady. Mysaly, osy chıpterdiń kómegimen Qytaıdyń DeepSeek kompanııasy jyl basynda óz JI modelin oqytyp, ol óz kezeginde Nvidia aktsııalarynyń kúrt tómendeýine sebep bolǵan. Nvidia-nyń negizgi chıpterinen aıyrmashylyǵy, H20 úlgileri arnaıy eksport úshin jasalǵan jáne olardyń ónimdiligi bastapqyda-aq eksporttyq shekteýlerge sáıkes etip tómendetilgen.
Eske sala keteıik, Amerıkanyń engizgen salyǵyna jaýap retinde Qytaı 12 sáýirden bastap AQSh taýarlaryna salynatyn baj salyǵyn 84%-dan 125%-ǵa deıin kóteredi.