Alpi taýynyń La-Plan kýrortyndaǵy qar kóshkininen brıtan shańǵyshysy ajal qushty

ASTANA. KAZINFORM — Frantsııalyq Alpi taýyndaǵy qar kóshkini saldarynan ulybrıtanııalyq shańǵyshy qaza tapty, dep habarlaıdy The Guardian.

– Boljam boıynsha shamamen 50 jastaǵy er adam 2,5 metr qar astynan 50 mınýttyq izdestirý sharalarynan keıin tabyldy, – dep habarlady Frantsııanyń ońtústik-shyǵysyndaǵy La-Plan kýrortynyń ákimshiligi.

Kýrort ákimshiliginiń aqparatyna súıensek, ol shańǵyshylardyń negizgi jolynan tys jerde shańǵy teýip júrgende qar kóshkini júrgen.

Joǵalǵan azamatty tabý úshin jeksenbi kúni kúndizgi ýaqytta 50-den astam adamnan turatyn qutqarý toby operatsııaǵa qatysty, onyń ishinde dárigerler, shańǵy mektebiniń nusqaýshylary jáne ıtter de boldy.

Oqys oqıǵa bolǵan kezde er adam toppen birge shańǵy teýip júrgen, biraq kýrort ákimshiliginiń habarlaýynsha, onyń kóshkinge qarsy transıveri (kóshkin kezinde adamdy qar astynan tabýǵa arnalǵan qurylǵy) bolmaǵan jáne ony kásibı nusqaýshy qadaǵalamaǵan.

Aıta keteıik, byltyr 27 jeltoqsanda Grekııanyń taýlarynda qar kóshkini júrip, tórt adam mert bolǵan edi. 

Al jýyrda ShQO-daǵy taýly jerlerde qar kóshkini júrý qaýpi tekserildi.