Álnazarova ushaqtaǵy oqıǵa jaıynda: paryzymdy oryndadym, bireýdiń aldynda aqtalmaımyn
ASTANA. KAZINFORM — Densaýlyq saqtaý mınıstri Aqmaral Álnazarova ushaqta medıtsınalyq kómek kórsetkenine kúmán bildirgenderge jaýap berdi.
Eske salsaq, jaqynda mınıstr ushaqta jaǵdaıy nasharlaǵan jolaýshyǵa alǵashqy medıtsınalyq kómek kórsetkenin jazǵan edik. Oqıǵa Astana-Almaty baǵytyndaǵy KS 622 áýe reısinde bolǵan. Keıin osy vıdeo áleýmettik jelide tarap ketti.
— Ókinishke qaraı, kúmán bildirip (áleýmettik jelide) jatqandar bar eken. Bul kómek kórsetken birinshi jaǵdaıym emes. Ushaq jolaýshysy ony vıdeoǵa túsirip, áleýmettik jelige salyp jibergen. Qan qysymy kóterilgen jolaýshyǵa alǵashqy medıtsınalyq kómek jasaldy, — dedi Aqmaral Álnazarova Parlament Májilisinde tilshiler suraǵyna jaýap bere otyryp.
Osy oraıda ol kez kelgen dáriger mundaı jaǵdaıda kómektesetinine senimdi ekenin aıtyp, medıtsına qyzmetkerlerine jarnama kerek emes ekenin atap ótti.
— Sondyqtan buǵan kúmánmen qaraıtyndaı eshqandaı negiz joq dep oılaımyn. Ár adam óz pikirin aıtýǵa quqyly jáne oǵan áser ete almaımyn. Sondyqtan atalǵan jaǵdaıda ózimniń paryzymdy oryndadym. Bireýdiń aldynda aqtalyp turatyndaı jaǵdaıym joq, — dedi mınıstr.