Álimhanulynyń V dopıng-synamasy nátıjesine qatysty federatsııa túsinikteme berdi

ASTANA. KAZINFORM – Qazaqstandyq kásipqoı boksshy, orta salmaqtaǵy álem chempıony Jánibek Álimhanulynyń V dopıng-synamasyn ashý rásimine qatysty Qazaqstannyń kásipqoı boks federatsııasy túsinikteme berdi.

Federatsııa prezıdenti Raqymjan Erdenbekovtyń aıtýynsha, V synamasyn ashý rásimi búgin AQSh-tyń ıÝta shtatyndaǵy Solt-Leık-Sıtı qalasynda halyqaralyq antıdopıngtik reglamentterge tolyq sáıkes ótkizilgen.

– Búgin Solt-Leık-Sıtı qalasynda (ıÝta shtaty, AQSh) qoldanystaǵy halyqaralyq antıdopıngtik reglamentter aıasynda jáne barlyq protsessýaldyq talaptardy saqtaı otyryp, sportshy Jánibek Álimhanulynyń V synamasyn ashý rásimi júrgizildi. Bul rásim obektıvti ári táýelsiz tekseristiń negizgi elementi bolyp tabylady, – dedi Rahımjan Erdenbekov.

Onyń aıtýynsha, synamany ashý rásimi sportshy komandasynyń ókilderi, beıindi mamandar jáne belgilengen tártippen qatysýǵa ruqsat etilgen barlyq múddeli taraptardyń qatysýymen ótken.

– Bul óz kezeginde qandaı da bir protsessýaldyq zańbuzýshylyqtyń bolý múmkindigin tolyq joqqa shyǵaryp, barynsha ashyqtyqty qamtamasyz etedi, – dep atap ótti federatsııa basshysy.

Raqymjan Erdenbekovtiń sózinshe, rásim aıaqtalǵannan keıin V synamasy mórlenip, tıisti zertteýler júrgizýge ýákiletti halyqaralyq akkredıttelgen zerthanaǵa resmı túrde tapsyrylǵan.

– Taldaý biryńǵaı standarttarǵa saı, qandaı da bir aralasýsyz nemese syrtqy yqpalsyz júrgizilýde, – dedi ol.

Federatsııa prezıdenti qazirgi kezeńde qandaı da bir qorytyndy jasaýǵa nemese aıyp taǵýǵa negiz joq ekenin erekshe atap ótti.

– Qazirgi ýaqytta qandaı da bir zańdyq nemese faktilik qorytyndy jasaýǵa, aıyp taǵýǵa nemese ınterpretatsııa berýge negiz joq. Qazaqstannyń kásipqoı boks federatsııasy sportshynyń kinásizdik prezýmptsııasyn jáne rásimge degen qurmetti qatań ustanady, – dedi Raqymjan Erdenbekov.

Ol federatsııa ustanymy ózgerissiz ekenin aıtty. Atap aıtqanda, federatsııa:

– taza ári adal sportty qoldaıdy;
– halyqaralyq antıdopıngtik tetikterdi qurmetteıdi;
– resmı zerthanalyq qorytyndy shyqpaı turyp, alypqashpa aqparatqa, qysymǵa jáne aqparattyq dúrbeleńge jol bermeıdi.

– Qoǵamdyq qyzyǵýshylyqty túsinemiz, sondyqtan jaǵdaıǵa sabyrmen, salmaqty túrde jáne tek quqyqtyq alańda áreket etýdi durys dep sanaımyz. Tek resmı zerthanalyq taldaý nátıjeleri ǵana keıingi sheshimder men jarııa málimdemelerge negiz bolady. Jaǵdaıdyń damýy týraly aqparat belgilengen tártippen, ýaqtyly jáne rastalǵan qujattar negizinde habarlanady, – delingen Qazaqstannyń kásipqoı boks federatsııasynyń málimdemesinde.

Aıta keteıik, buǵan deıin Jánibek Álimhanuly V dopıng-synamasyn ashýǵa baılanysty jeke málimdeme jasaǵan bolatyn.