Álimhanulynyń salmaǵynda qazaq boksshysy chempıondyq jekpe-jekke shyǵatyn boldy
ASTANA. KAZINFORM — Kásipqoı boksshy Meıirim Nursultanovqa (20–0, 11 KO) orta salmaqtaǵy WBC chempıony, domınıkandyq Karlos Adamespen (24–1–1, 18 KO) mindetti tıtýldyq jekpe-jek belgilendi. Bul týraly Sports.kz habarlaıdy.
Nursultanov WBC nusqasy boıynsha orta salmaq reıtınginde birinshi orynda tur jáne chempıondyq beldikke resmı úmitker mártebesine ıe.
«Búgin WBC Konventsııasynda mindetti jekpe-jekter boıynsha jyl saıynǵy sessııa ótti. Tómende sol jıynda bekitilgen birqatar jekpe-jekterdi kóre alasyzdar», - dep jazady The Ring basylymy Instagram paraqshasynda.
Meıirim Nursultanov sońǵy ret 2023 jyldyń kúzinde Tashkentte rıngke shyǵyp, chılılik Hýlıo Alamosty tóreshilerdiń biraýyz sheshimimen jeńgen bolatyn.
Aıta keteıik, keshe orta salmaqtaǵy WBO/IBF tujyrymdamalarynyń chempıony, qazaqstandyq Jánibek Álimhanuly men WBA chempıony, kýbalyq Erıslandı Lara arasyndaǵy jekpe-jek toqtatylǵan edi. Dopıng-test qorytyndysy boıynsha Álimhanulynyń synamasynan tyıym salynǵan zat tabylǵan.
