Álimhanuly úsh belbeý úshin ótetin jekpe-jek aldynda jankúıerlerine ýáde berdi
ASTANA. KAZINFORM – WBO jáne IBF nusqalary boıynsha orta salmaqtaǵy álem chempıony Jánibek Álimhanuly 6 jeltoqsanda ótetin, WBA belbeýiniń ıegeri kýbalyq Erıslandıı Laraǵa qarsy aıqasy qarsańynda málimdeme jasady.
Boksshy óziniń H áleýmettik jelisindegi jazbasynda aldaǵy qarsylasynyń deńgeıin atap ótip, jankúıerlerine naqty ýáde berdi.
«Lara meniń deńgeıimdegi boksshymen áli judyryqtasqan joq. Ol «Jánibek meniń deńgeıimde eshkimmen jekpe-jekke shyqpady» depti. Biraq men de aıta alamyn, ol da meniń deńgeıimdegi boksshymen kezdesken joq. Men jyl nokaýtyn jasaımyn», – dep jazdy Jánibek Álimhanuly.
Boksshy jazbasyna teńiz jaǵasynda túsirilgen sýretin qosa jarııalaǵan.
Sharshy alańdaǵy jekpe-jek orta salmaqtaǵy tórt negizgi chempıondyq belbeýdiń úsheýi úshin ótedi. Báseke AQSh-tyń Tehas shtatyndaǵy San-Antonıo qalasynda ornalasqan Frost Bank Center arenasynda uıymdastyrylady. 42 jastaǵy Erıslandı Lara tájirıbesi men taktıkalyq sheberligimen tanymal jáne Jánibektiń karerasyndaǵy eń kúrdeli qarsylastardyń biri sanalady.
Buǵan deıin Álimhanuly jekpe-jek aldyndaǵy dopıng-test nátıjesin jarııalaǵan bolatyn. Sondaı-aq ol 6 jeltoqsanda Larany qalaı jeńetinin de aıtyp ótken edi.