Álimhan Syzdyqov Azııa chempıonatynda kúmisti qanaǵat tutty

ASTANA. KAZINFORM — Iordanııa astanasy Amman qalasynda ótip jatqan Azııa chempıonatynda qazaqstandyq Álimhan Syzdyqov grek-rım kúresinen kúmis júldeger atandy.

Osyǵan deıin sporttyq jolynda Azııa oıyndarynda úshinshi orynǵa ıe bolyp, qurlyq chempıonatynda altyn, kúmis jáne qola alǵan qazaqstandyq balýan 130 kelige deıingi salmaqta 20 jastaǵy ırandyq Fardın Hedaıatımen beldesti.

Irandyq sportshy beldesýdi birden qarqyndy bastap, aıqyn basymdylyqpen jeńiske jetti – 7:0.

Osylaısha, Qazaqstan qorjynyna bir kúmis, eki qola júlde tústi.

Jarystyń alǵashqy kúni ózbekstandyq balýandar tamasha kúresip, úsh altyn medaldi jeńip aldy. Atap aıtqanda, 19 jastaǵy Aıtjan Halmahanov (63 kg), Aram Vardanıan (77 kg jáne Jalǵasbaı Berdimuratov (87 kg) óz salmaq dárejeleri boıynsha úzdik shyqty.

Eske sala keteıik, budan buryn Ibragım Magomadovtyń ekinshi ret Azııa chempıonatynda qola júldeger atanǵanyn jazǵan bolatynbyz.

Grek-rım kúresinen Azııa chempıonatynda Qazaqstan qorjynyna taǵy bir qola tústi.