Álimbet, Jaısan jáne Syrym ótkizý pýnktterindegi jaǵdaı Úkimet baqylaýynda
ASTANA. KAZINFORM – Úkimette memlekettik shekaradaǵy avtokólik ótkizý pýnktterindegi jaǵdaı boıynsha jedel keńes ótti
Qazaqstan Respýblıkasy Premer-mınıstriniń tapsyrmasy boıynsha QR Premer-mınıstriniń birinshi orynbasary Nurlybek Nálibaevtyń tóraǵalyǵymen avtomobıl ótkizý pýnktterindegi aǵymdaǵy ahýal máseleleri jáne kólik aǵynyn uıymdastyrý tıimdiligin arttyrý boıynsha júrgizilip jatqan jumystar jóninde keńes ótti.
Jıynǵa Kólik, Qarjy, Aýyl sharýashylyǵy mınıstrlikteriniń, Ulttyq qaýipsizdik komıteti Shekara qyzmetiniń jáne «QazAvtoJol» UK» AQ basshylary qatysty.
QR UQK Shekara qyzmetiniń memlekettik shekaradaǵy ahýal jáne «Álimbet», «Jaısan», «Syrym» ótkizý pýnktteri arqyly avtokólik quraldarynyń jedel ótýin qamtamasyz etý boıynsha qabyldanyp jatqan sharalar týraly baıandamasy tyńdaldy. Qazaqstan tarapyndaǵy ótkizý pýnktteri táýlik boıy shtattyq rejımde jumys isteıdi. Elimizdiń aýmaǵy arqyly ótetin tranzıttik tasymaldardyń maýsymdyq artýyn eskere otyryp, EAEO ishki kontýryndaǵy avtomobıl ótkizý pýnktteriniń ýaqtyly jańǵyrtylýyna baqylaý kúsheıtilgeni atap ótildi. Bul baqylaýdan ótý ýaqytyn qysqartady.
Budan bólek, júk tasymaldaýshylarǵa qolaıly jaǵdaı jasaý maqsatynda basymdyq berilgen ótkizý pýnktteriniń mańynda júrgizýshilerge arnalǵan kútý servıstik aımaqtary qurylady. Bul shekaralyq baqylaýdan ótý kezeńinde júrgizýshilerdiń jaıly jaǵdaıda bolýyn qamtamasyz etedi. Tıisti jumystardy 2027 jyly aıaqtaý josparlanyp otyr.
Jıyn qorytyndysy boıynsha avtokólik quraldarynyń úzdiksiz jáne jedel ótkizilýin qamtamasyz etý boıynsha tapsyrmalar berildi. Osy maqsatta Kólik mınıstrligi múddeli memlekettik jáne jergilikti atqarýshy organdarmen birlesip jedel shtabtar ashty. Jaǵdaı Úkimettiń tikeleı baqylaýynda.
Aıta ketelik BQO-da Reseımen shekarada júk kólikteri taǵy da kepteliske tap bolǵany týraly jazǵan edik.
