«Álimbet» beketi arqyly kólik ótkizý kólemi úsh eseden astam artady
ASTANA. KAZINFORM — Joba aıaqtalǵannan keıin pýnkttiń ótkizý qabileti úsh eseden astam artyp, táýligine 700-den keminde 2 500 jeńil jáne júk kóligi men avtobýsqa deıin ulǵaıady. Al jeke tulǵalardy ótkizý múmkindigi táýligine 1 500-den 3 000 adamǵa deıin artady.
Aqtóbe oblysynda Qazaqstan — Reseı shekarasyndaǵy «Álimbet» avtomobıl ótkizý pýnktin qaıta jańartý jumystary jalǵasyp jatyr.
Qurylys jumystary jalpy aýmaǵy 10,5 gektar aýmaqta birneshe ýchaskede qatar júrgizilip jatyr. Nysanda 147 maman men 39 arnaıy tehnıka jumyldyrylǵan. Joba aıasynda ákimshilik ǵımarat, tereńdetilgen tekserýge arnalǵan angar, tekserý qalqalary, qyzmettik kólikterge arnalǵan garaj, avtobýs turaqtary jáne 20 qyzmettik ıtke arnalǵan pıtomnık salý kózdelgen.
Jobanyń negizgi nysandarynyń biri — zamanaýı ınspektsııalyq-tekserý kesheni. Jańa keshen kólik quraldary men júkterdi baqylaýdyń tıimdiligin arttyryp, uzaq ýaqytty qajet etetin qolmen tekserý júrgizbeı-aq jasyrylǵan zattar men júkterdi anyqtaýǵa múmkindik beredi.
«Álimbet» ótkizý pýnkti Qarǵaly aýdanynda, Reseı Federatsııasynyń «Orsk» ótkizý pýnktine qarama-qarsy ornalasqan. Pýnkt 2003 jyldan beri jumys isteıdi, birinshi sanattaǵy kópjaqty ótkizý pýnkti mártebesine ıe jáne táýlik boıy qyzmet kórsetedi.
Jańǵyrtý nátıjesinde Qazaqstan — Reseı shekarasyndaǵy mańyzdy ótkizý baǵyttarynyń biriniń ótkizý qabileti edáýir artady. Bul shekaralyq baqylaýdan ótý ýaqytyn qysqartýǵa, kólik aǵynyn jedeldetýge jáne azamattar men avtotasymaldaýshylar úshin qolaıly jaǵdaı jasaýǵa múmkindik beredi.
Aıta ketelik el shekarasyndaǵy 30 ótkizý pýnkti jańǵyrtylatyny týraly jazǵan edik.
