Almazbek Atambaevtyń úıinen túrli qarý-jaraqtar tabyldy
BІShKEK. KABAR – QazAqparat – Qyrǵyz Respýblıkasynyń eks-prezıdenti Almazbek Atambaevtyń Qoı-Tash aýylyndaǵy úıinen túrli qarý-jaraqtar men jarylǵysh zattar tabyldy, dep habarlaıdy Kabar.
Agenttiktiń Qyrǵyz ІІM silteme jasaǵan habarlamasynda, Atambaevtyń úıinen Dragýnov snaıperdik vıntovkasy (SVD), Sımonov ózdigimen zarıadtalatyn karabın (SKS), pıstolet-pýlemet qurylymyndaǵy pıstolet «Kapral» t.b. qarý-jaraq túrleri tárkilengen. Barlyǵy 11 birlik jarylǵysh jáne janatyn qarý tabyldy.
Qazirgi kezde eks-prezıdenttiń úıinen tabylǵan qarý-jaraqtarǵa krımınalıstıkalyq saraptamalar jasalýda.
Eske salaıyq, 8 tamyz kúni keshqurym Qyrǵyzstannyń Іshki ister mınıstrligi Atambaevtyń ustalǵanyn resmı habarlaǵan bolatyn.
7 tamyz kúni A.Atambaevtyń Qoı-Tash aýylyndaǵy úıinde atys boldy. Arnaıy operatsııa saldarynan Bishkek qalasy men Shý oblystyq birikken aýrýhanalaryna túrli jaraqatpen 45 adam tústi. Shý oblystyq Іshki ister bas basqarmasynyń basshysy Samat Qurmanqulov aýyr halde jatyr. Arnaıy jasaq quramyndaǵy bir adam kóz jumdy.
Málim etilgendeı, quqyqqorǵaý organdary tarapynan azamattarǵa qatysty atys qarýy qoldanylǵan joq. Qarý A.Atambaevtyń jaqtastary tarapynan atylǵan.
Atambaevtyń úıinde bolǵan oqıǵalardan keıin Qyrǵyzstannyń Bas prokýratýrasy «Jappaı tártipsizdikter», «Buzaqylyq», «Adam óltirý», «Adamdy kepilge alý» baptarymen sotqa deıingi tergeý amaldaryn bastaǵanyn málimdedi. Degenmen, el astanasyndaǵy jaǵdaı turaqty ekeni atap ótildi. Aıta ketsek, 8 tamyzda Qyrǵyzstanǵa Sholpan atada ótetin EAEO elderiniń Úkimet basshylary kezdesýine (9 tamyz) resmı delegatsııalar kele bastady. «Eldegi oqıǵalarǵa qaramastan, Eýrazııa úkimetaralyq keńesi belgilengen ýaqytynda ótedi», - dep málimdedi Qyrǵyz Respýblıkasy premer-mınıstriniń baspasóz hatshysy Ádilet Sultanalıev.
Sondaı-aq 8 tamyzda Jogorký Keneshtiń kezekten tys otyrysy ótip, onda el prezıdenti Sooronbaı Jeenbekov bılik «halyqtyń bólinýine, turaqsyzdyqtyń ornaýyna jol bermeıtinin» málim etti.
«Atambaevtyń taraby atys qarýyn qoldanǵanyna qaramastan, arnaıy kúshter atys patrondaryn paıdalanǵan joq», - dedi ol.
«Eger keshegi kúnge deıin Atambaevty tergeýge kýáger retinde shaqyrsa, endi oǵan asa aýyr qylmys jasaǵany úshin kúdikti retinde qaraıtyn bolady», - dedi Jeenbekov.
Budan bólek, parlament otyrysynda depýtat Myktybek Abdyldaev Atambaevtyń úıine shabýyl jasaý kezinde tutqynǵa alynǵan arnaıy jasaq qyzmetkerleri bosatylǵanyn habarlady.
Aıta ketsek, buǵan deıin Jogorký Kenesh eldiń eks-prezıdentinen qol suqpaýshylyq mártebesin alyp tastaý týraly sheshim qabyldaǵan bolatyn. Atambaevqa qatysty depýtattar tarapynan taǵylǵan aıyptardy zertteý boıynsha arnaıy depýtattyq komıssııa quryldy. Komıssııa jumysynyń nátıjesinde oǵan 6 epızod boıynsha aıyp taǵý sheshimi qabyldandy. Alaıda Bas prokýratýra komıssııanyń jumysyn zań turǵysynan baǵalaı kele, tek bes epızodty qaldyrdy.
