Almazbek Atambaev úlken saıasatqa qaıta kelýi múmkin - QHQK
ASTANA. QazAqparat - Aldaǵy ýaqytta Qyrǵyzstannyń eks-prezıdenti Almazbek Atambaev basqarýshy partııanyń tóraǵalyǵyna saılanýy múmkin. Bul týraly Qazaqstannyń xalyqaralyq qatynastar keńesiniń tóraǵasy Erlan Qarın aıtty, dep xabarlaıdy QazAqparat tilshisi.
«Qyrǵyzstannyń partııalar maıdanynda saıası belsendilik artýy ábden múmkin. Sebebi Almazbek Atambaev úlken saıasatqa qaıta oralmaqshy. Jaqyn arada ol Qyrǵyzstannyń basqarýshy partııasy - sotsıal-demokrattardyń jetekshiligine keledi degen boljam bar. Sóz joq, bunyń bári osy eldiń ishki ómirine óz áserin tıgizedi. Qyrǵyz sarapshylaryna sensek, merziminen buryn parlamenttik saılaý da ótýi múmkin», - deıdi saıasattanýshy Erlan Qarın.
Al Irandaǵy qazirgi jaǵdaıǵa qatysty suraqqa saıasattanýshy kórshi Qyrǵyzstandy mysal retinde keltirdi. Onyń aıtýynsha, belgili bir shıelenister kezinde boljamdar kóp bolady. Al naqty saraptama, sonyń ishinde aımaqtyq saraptama jasalmaıdy. Biz, kóp jaǵdaıda, ishki máselelermen shektelemiz.
«Qazir Iran deımiz, osy joly biz Qyrǵyzstannyń ózin úsh-tórt aı talqyladyq ta, qoıdyq. Al erteń ol jaqta taǵy bir tosyn jaǵdaı týyndap jatsa, bizdiń sarapshylar Qyrǵyzstandaǵy ishki saıası kúshterdiń araqatynasyn, kimniń qandaı baǵytta, qandaı kózqarasy men jospary bar ekenin dóp basyp, aıta almaıdy», - dep atap kórsetti E.Qarın.
Aıta keteıik, búgin Qazaqstannyń xalyqaralyq qatynastar keńesi (QHQK) bıylǵy jyldyń mańyzdy oqıǵalaryn jarııalady. Sarapshylardyń aıtýynsha, aǵymdaǵy jylda Ortalyq Azııanyń ekonomıkasy ósedi. Budan bólek, Ortalyq Azııa basshylary 2005 jyldan beri alǵash ret kezdesýi múmkin degen boljam bar.
