Almazbek Atambaev resmı túrde Qyrǵyz Respýblıkasynyń Prezıdenti qyzmetine kiristi
BIShKEK. 1 jeltoqsan. QazAqparat /Qanat Qulyshmanov/ - Búgin Bishkek qalasynyń T.Satylǵanov atyndaǵy Ulttyq fılarmonııasynda Qyrǵyz Respýblıkasynyń jańadan saılanǵan Prezıdenti Almazbek Atambaevty saltanatty túrde ulyqtaý rásimi ótti.
Inaýgýratsııa rásiminde sóz sóılegen ótpeli kezeń Prezıdenti Roza Otynbaeva Almazbek Atambaevtyń jańa qyzmette ádil jáne adal jumys istep, óziniń bilimi men tájirıbesin eldiń birligine, qaýipsizdigi men gúldenýine baǵyttaıdy degen senimin bildirdi.
Budan keıin OSK tóraǵasy Týıgýnaaly Abdraımov qaýlynyń mátinin oqydy, Almazbek Atambaev Konstıtýtsııanyń arnaıy danasyna qolyn qoıyp ant qabyldady.
Qyrǵyzstannyń tórtinshi Basshysyna prezıdenttik shtandart, tósbelgisi men QR Prezıdentiniń kýáligi tabystaldy. Sol mezetten bastap ol resmı túrde qyzmetine kiristi.
