Almazbek Atambaev arnaıy jasaqqa oq atqanyn moıyndady
NUR-SULTAN. QazAqparat – Qyrǵyzstannyń burynǵy prezıdenti Almazbek Atambaevty ustaý úshin onyń úıine kelgen arnaıy jasaq úshinshi qabatqa kóterilgende joǵary qaraı bes-alty ret oq atqanyn aıtty, dep habarlaıdy «QazAqparat» HAA 24.kg saıtyna silteme jasap.
«Qarý tek mende ǵana boldy. Arnaıy jasaq úshinshi qabatqa kóterilgende joǵary qaraı bes-alty ret oq attym», - dedi Almazbek Atambaev.
Onyń aıtýynsha, bólme qarańǵy bolǵan. «Rıkoshet bolǵan shyǵar, bálkim tıgen shyǵar, bilmeımin. Men jigitterdiń eshbirine dál tıgizýdi oılaǵan joqpyn, biraq áldekim olardy alǵa qaraı ıtermeleı berdi. Men birden qarsylasatynymdy aıtyp eskerttim. Muny meniń jigitterimniń moınyna ilmeýi úshin ashyq aıtyp otyrmyn», - dedi Atambaev.
Almazbek Atambaev qarýdyń bárin jınap alyp, úıiniń úshinshi qabatyna jıyp qoıǵanyn jetkizdi. «Halyq bárin tapsyrdy, biz eshkimniń qolyna qarý bermeımiz», - dedi ol.
Eske sala keteıik, Qyrǵyz Respýblıkasynyń Memlekettik ulttyq qaýipsizdik komıtetiniń arnaıy jasaq mamandary burynǵy Prezıdent Almazbek Atambaevty ustaý operatsııasyn júrgizdi.
Alaıda, oqıǵaǵa Atambaevtyń jaqtastary aralasyp, arnaıy jasaqty onyń úıine kirgizbegen. Atambaevty ustaý úshin ekinshi ret áreket jasaǵan kezde, jappaı tártipsizdikter bastalǵan. Qaqtyǵysta adam shyǵyny bolǵan.
Budan tys, qyryqtan astam adam zardap shekken.
Zardap shekkenderdiń arasynda Shý oblysy Іshki ister bas basqarmasynyń bastyǵy Samat Qurmanqulov ta bar. Qazir dárigerler onyń ómirin saqtap qalýdyń qamynda.
Aıta keteıik, Qazaqstan Prezıdenti Qasym-Jomart Toqaev Qyrǵyzstandaǵy bolyp jatqan jaǵdaıdy muqııat baqylap otyr.
