Almaz Sharman: Vaktsınanyń áseri adamnyń janyna batatyndaı aýyr bolmaıdy
ALMATY. QazAqparat- Qazaqstan profılaktıkalyq medıtsına akademııasynyń prezıdenti Almaz Sharman onlaın brıfıng barysynda koronavırýsqa qarsy vaktsınatsııaǵa qatysty jıi qoıylatyn suraqtarǵa jaýap berdi, dep habarlaıdy QazAqparat tilshisi.
Onyń aıtýynsha, qazir koronavırýspen kúreste vaktsına salý ony jeńýdiń jalǵyz joly.
«El turǵyndaryna vaktsınanyń úsh túri salynyp jatyr. Bul mýtatsııaǵa ushyrap jatqan vırýsqa qarsy tıimdi nátıje berýde. Desekte, ekpe jaqsy nátıje berý úshin halyqtyń basym bóligi egilý kerek. Eger jetkilikti túrde doza salynbasa aýrýdy jeńý qıyn bolady. Adamdar qanshalyqty jyldam vaktsına saldyrsa, soǵurlym tezirek ujymdyq ımmýnıtet qalyptasady. Sondyqtan vaktsına saldyrý koronavırýspen kúreste óte mańyzdy bolyp otyr», - deıdi Almaz Sharman.
Sonymen qatar, ol vaktsına adamdarǵa ártúrli sıpatta áser etip jatqanyna qatysty jaýap berdi.
«Vaktsına salǵan soń onyń áseri adamnyń janyna batatyndaı aýyr bolmaıdy. 24 saǵat ishinde dene qyzýy kóterilip, býyndar syrqyraıdy. Ol kezde dene qyzýyn túsiretin dári qabyldaǵan durys. Vaktsına ımmýndyq júıe vırýspen kúresý úshin ony jattyqtyrýǵa arnalǵan. Máselen, ádette biz jattyǵý jasaǵan soń erteńinde denemiz aýyrady ǵoı, bul da sol sııaqty», - dedi ol.
Onyń aıtýynsha vaktsına alǵan soń adam denesinde birden antıdene túziledi, biraq koronavırýspen kúreste ol sheshýshi ról atqarmaıdy.
«Birinshi «M» klasty antıdene paıda bolady. Keıin olardy «G» klasynyń antıdenesi almastyrady. Olar 14 kún bolǵanda sharyqtaý shegine jetedi de, báseńdeı beredi. Odan keıin aǵzadaǵy antıdene tıtrynyń kórsetkishine mán berýdiń qajeti joq. Olar koronavırýsty zalalsyzdandyrýda mańyzdy rólge ıe, biraq olar eń bastysy emes. Ol ımmýndyq júıeniń áskeri sııaqty. Immýndyq qorǵanysta lımfotsıtter mańyzdy rólge ıe. Olar baıaý túziledi, biraq koronavırýspen kúreske anaǵurlym daıyndalǵan jáne kúshi joǵary. Ony zerthanada anyqtaý óte qıyn. Degenmen vaktsına alǵan soń olar túzilip, koronavırýstyń shabýlyn kútedi. ıAǵnı koronavırýs juqqan jasýshalardy óltiredi», - dedi Qazaqstan profılaktıkalyq medıtsına akademııasynyń prezıdenti Almaz Sharman.
