Almaz Sharman: Vaktsına alýdyń ne úshin qajet ekenin túsinbeıtinder kóp
NUR-SULTAN. QazAqparat – Profılaktıkalyq medıtsına akademııasynyń prezıdenti, Amerıka densaýlyq saqtaý qaýymdastyǵynyń múshesi, professor, ımmýnolog Almaz Sharman halyqty vaktsına aýlǵa yntalandyrý sharalary týraly pikir bildirdi, dep habarlaıdy QazAqparat.
«Men bul máselege jeke adamnyń quqyǵy turǵysynan emes, qoǵamdyq densaýlyq saqtaý túrǵysynan qaraý kerek dep oıaımyn. Bul iste qoǵamnyń quqyǵy iske qosylyp otyr. Mindetti vaktsınatsııa dep atasaq, mundaı tásil álemniń ózge elderinde de bar. Mysaly, AQSh-tyń Mıchıgan shtatynda aýrýhananyń búkil medıtsınalyq personaly vaktsına alýǵa mindettelgeni týraly habar tarady. Kalıfornııa shtatynda da osyndaı jaǵdaı bolyp jatyr. Keıbir elder lotoreıa oınatyp jatyr. Meniń oıymsha, onda turǵan eshqandaı tańǵalatyn dúnıe joq. Tipti durys dep esepteımin. Ótkeni vaktsına alýdyń ne úshin qajet ekenin naqty túsinbeıtinder kóp», - deıdi professor.
Immýnologtyń aıtýynsha, koronvırýsty aıtarlyqtaı jeńil ótkerip jatqandar bar.
«Bul vırýstyń eń qaýiptiligi osy jerinde. Vırýs juqtyrǵandardyń jartysyna jýyǵy ony eshbir sımptomsyz ótkeredi. Sóıtip júrip ondaı adamdar mańaıyndaǵynyń bárine aýrý juqtyrady. Al olardyń ishinde ımmýnıteti álsizder álgi sımptomsyz aýyrǵan adamnyń sebepker bolýymen kóz jumýy múmkin.
Sondyqtan vaktsınalaý máselesinde jeke adamnyń quqyǵynan qoǵamnyń múddesi joǵary tur. Mindetti vaktsınatsııa – qoǵamnyń quqyǵyn qorǵaý dep bilemin»¸-degen sarapshy vaktsınalaýdyń mańyzy týraly mysal keltirdi.
«Dámhanaǵa vaktsına almaǵan 4 adam keldi deıik. Daıashy vırýsty sımptomsyz ótkerip júrgen bolsa, tórteýine de aýrý juqtyrýy múmkin. Onyń bireýi tipti reanmıtsııaǵa túsip, ómirin qaýip tqnýi yqtımal. Mundaı jaǵdaıda kimniń quqyǵyn birinshi kezekte qorǵaýymyz kerek? Vaktsına alýdan bas tartqan daıashynyń quqyǵyn qorǵaý mańyzdy ma, álde dámhanaǵa tamaqtaný úshin keletin turǵyndardyń qaýipsizdik quqyǵy mańyzdy ma? Bul mysal mindetti vaktsınatsııa tamaqtaný, qyzmet kórsetý salasyna ǵana qatysty bolý kerek degen sóz emes. Óıtkeni qazir qolymyzdaǵy jalǵyz qarý – vaktsına», - dedi Amerıka densaýlyq saqtaý qaýymdastyǵynyń múshesi.
