Almaz Sharman: Revaktsınatsııa jyl saıyn jasalýy múmkin

ALMATY. QazAqparat - Profılaktıkalyq medıtsına akademııasynyń prezıdenti Almaz Sharman megapolıste jedel repıratorly vırýstyq ınfektsııanyń órshýine qatysty túsinikteme berdi, dep habarlaıdy QazAqarat tilshisi.

Ǵalymnyń aıtýynsha, koronavırýs, tumaý jáne jedel respıratorly vırýs ınfektsııasynyń sımptomdary uqsas. Biraq koronavırýsta dám, ıis joǵalyp, entikpe paıda bolýy múmkin.

«Koronavırýsty PTR testi arqyly anyqtaǵan jón. Onyń belgileri bolsa taldaý jasaý jáne kez kelgen jaǵdaıda, tipti koronavırýs bolmasa da, oqshaýlaý usynylady», - dep keńes berdi professor Almaz Sharman.

Professor qala turǵyndaryn koronavırýsqa ǵana, tumaýǵa da qarsy belsendi vaktsınalanýǵa shaqyrdy.

«Men koronavırýs vaktsınasyn aldym, al jaqynda tumaýǵa qarsy egildim. Bul eki túrli ınfektsııa jáne olardyń ózara uqsas bolýy múmkin. Qosarlanǵan ınfektsııanyń saldary árqashan aýyr bolady», - dedi spıker.

Sondaı-aq, ol qazirdiń ózinde vaktsınatsııalanǵan azamattarǵa, ásirese 60 jastan asqan jáne sozylmaly aýrýlary bar adamdarǵa koronavırýsqa qarsy revaktsınatsııa alý kerektigin aıtty.

«Izraıl ǵalymdary koronavırýs ınfektsııasyna ımmýndyq jaýaptyń vaktsınanyń alǵashqy eki dozasynan soń 6 aıdan keıin tómendeıtinin dáleldedi. Sondyqtan revaktsınatsııa usynylady. Ol qanshalyqty jıi qajet bolatyny áli naqty belgisiz. Ol jyl saıyn ótýi múmkin, munyń bári pandemııanyń qalaı bolatynyna baılanysty», - dedi Almaz Sharman. Professor koronavırýs ınfektsııasy endemııalyq bolǵandyqtan, bizben uzaq ýaqyt bolady dep sanaıdy. Sondyqtan múmkindiginshe kóp adamnyń vaktsınalanýy jáne revaktsınatsııadan ótýi óte mańyzdy.