Almaz Sharman koronavırýs ınfektsııasy qandaı joldarmen juǵatynyn túsindirdi
«Koronavırýs ınfektsııasynyń taralýy pandemııaǵa tán sıpatqa ıe bolyp bara jatqan sekildi. Qazirdiń ózinde tıisti qorǵanys sharalaryn qabyldaý kerek. Eń aldymen aıǵaı-súreń men jalǵan aqparlarǵa senbeýge shaqyrar edim. Shynaıy aqparatqa súıenip, ınfektsııanyń qandaı jolmen taraıtynyn anyqtap alǵan abzal. Koronavırýs juqtyrǵan adammen jaqyn qarym-qatynasta bolǵan jaǵdaıda jótel nemese túshkirý kezinde, ıaǵnı aýa arqyly quramynda vırýsy bar silekeı arqyly juǵady. Bul tamshylar kisiniń janynda turǵan adamǵa jetip, qasyndaǵy adam ony jutyp qoıýy múmkin», - dep jazady Almaz Sharman Facebook paraqshasynda.
Onyń aıtýynsha, vırýsy bar adamnan 2 metr ǵana qashyqtyqta turǵan kisi 10 mınýttyń ishinde ózi de koronavırýs ınfektsııasyn juqtyrýy múmkin.
«Sonymen birge, vırýsty tamshylar ártúrli zattardyń betine de, máselen avtobýstyń oryndyǵyna, kitap pen klavıatýraǵa, tintýirge shashyraýy yqtımal. Sol úshin árdaıym qolyńyzdy taza sýmen jýyp otyrǵan jón. Alaqandy ysqylaı jýyp, býynnyń syrtqy bóliginde, saýsaqtar men tyrnaq ishin de tazalap otyrý kerek. Qoldy shamamen 20 sekýndtan artyq jýý kerek. Jótelgen nemese túshkirgen kezde murnyńyz ben aýzyńyzdy meılinshe salfetkamen jabýǵa tyrysyńyz. Qoldanylǵan salfetkany birden laqtyryp otyrý kerek. Eger qasyńyzda salfetka bolmasa, aýzyńyzdy alaqanyńyzben emes, shyntaqpen jabýǵa tyrysyńyz», - deıdi professor.
Budan bólek Almaz Sharman qarapaıym medıtsınalyq maskalar jetkilikti dárejede qorǵaı almaıtynyn aıtady.
«Alaıda maskalar kishkentaı aerozoldy bólikterden saqtaı almaıdy. Sonymen qatar maska kózdi de qorǵaı almaıdy. Kóz arqyly da vırýs aǵzaǵa enip ketýi yqtımal. Basqasha aıtqanda maskalar koronavırýs ınfektsııasynan jetkilikti dárejede qorǵaı almaıdy», - dedi ol.