Almaz óndirisine qyrýar qarajat salyp, san soǵyp qaldy
AQTAÝ. KAZINFORM – Mańǵystaýda bir top turǵyn alaıaqqa jem bolǵandaryn aıtyp, oblystyq prokýrarýranyń aldyna jınaldy. Olar jarnamaǵa senip, ońbaı aldanǵan.
2019 jyly «Sax Invest» kompanııasyna almaz óndirisi úshin árqaısysy 10-15 myń AQSh dollary kóleminde qarjy aýdarypty. Alaıda, qarasha halyqtyń senimine kirgen kompanııa basshysy turǵyndardyń qarajatyn ıemdenip, baılanysty úzgen.
Turǵyndardyń aıtýynsha, aldanǵandardyń sany bir myńǵa jýyqtaıdy.
- Sátjan degen jigit. Ol bizge aqshany qaıtaramyz dep, mindetteme qaǵazyn berdi. Soǵan senip qaldyq. Biraq, ol kisi keıin habarsyz ketti. Tek áleýmettik jeliden baqylap, Angolada júrgenin kóremiz. Soǵan senip osy ýaqytqa deıin otyrdyq, - deıdi, Aqtaý qalasynyń turǵyny Gúlshar Bergarına.
Qala turǵyny Alla Gafýler atalǵan kompanııaǵa kóligin satyp, 10 myń dollar tólegen. Sodan aı saıyn 2 paıyz paıda túsedi dep sendirgen.
- Bul kisi bizge kelip óz kompanııasyn jarnamalap, aktsııaǵa ınvestıtsııa salasyńdar dep aldady. Onyń sózine senip, men kóligimdi satyp 10 myń AQSh dollaryn saldym. Salǵan aqshamyzdy qaıtaratyn kepilhatyn da berdi. Mine, bes jyl boıy tabys túgili, óz aqshamyzdy ala almaı otyrmyz, - deıdi ol.
Mańǵystaý oblystyq prokýratýrasynyń basqarma basshysy Danııar Tólegenovtiń málimdeýinshe, osy iske qatysty Astana qalasynda qylmystyq is qozǵalyp, kúdiktiler qamaýǵa alynǵan.
- Astana qalalyq ekonomıkalyq tergeý departamentimen Qylmystyq kodekstiń 217-babynyń 3-bóligimen sotqa deıingi tergep-tekserý júrgizilýde. Osy is boıynsha atalǵan organmen kúdikti tulǵalar ustaldy. Budan basqa tergeý áreketteri taǵy jalǵasýda. Sonymen qatar búgin Mańǵystaý oblysy prokýratýrasynyń basshylyq quramymen osy salymshylarǵa jeke qabyldaý júrgizilip, tıisti zańdy túsindirme berildi, - deıdi Danııar Tólegenov.
Qarjylyq monıtorıng agenttiginiń málimetinshe, «Sax Invest» kompanııasy halyqtyń 9 mıllıard teńgege jýyq qarajatyn ıemdengen.
Buǵan deıin Mańǵystaý oblysynda qaterli dertke shaldyqqan naýqastar járdemaqydan qaǵylǵanyn jazǵanbyz.
