Almatynyń jol polıtseıleri iri jol-kólik apatynan keıin izin sýytqan sheteldik kóliktiń júrgizýshisin ustady
ALMATY. 19 naýryz. QazAqparat - Almatynyń jol polıtseıleri iri jol-kólik apatynan keıin izin sýytqan sheteldik kóliktiń júrgizýshisin ustady, dep habarlady qalalyq ІІD-niń jol polıtsııa basqarmasynan.
Ol 25 jastaǵy almatylyq turǵyn, «Leksýs RX 300» kóliginiń júrgizýshisi bolyp shyqty. Aǵymdaǵy jyldyń 12 naýryzynda saǵat 00.20-da «Leksýstyń» júrgizýshisi Jandosov jáne Karskaıa kósheleriniń qıylysynda jol qozǵalysy erejesin buzyp, qarsy baǵytqa qaraı shyǵyp ketken.
«Jol qozǵalys erejesin óreskel buzǵan júrgizýshiniń áreketteri birneshe kólikterdiń qatysýymen bolǵan jol-kólik apatynyń oryn alýyna ákep soqty. «Leksýstyń» júrgizýshisi qarsy baǵytqa shyǵyp, Jandosov kóshesinen batysqa qaraı bet alǵan «Deý Neksıa NS» kóligimen soqtyǵysty. Onymen birge Jandosov kóshesinen shyǵysqa qaraı bet alǵan taǵy da bir «Mersedes Bents 280 E» kóligimen soqtyǵysty. Bul kólik apatynda «Toıota Prado» kóligi zaqymdandy», - dedi Almaty qalasy ІІD jol polıtsııa basqarmasy izdestirý bóliminiń basshysy, polıtsııa polkovnıgi Rashıd Ahmetqazın.
Apattyń saldarynan «Deý Neskıa» kóliginiń eki júrgizýshisi oqıǵa ornynda jantásilim etti, al bul kóliktiń júrgizýshisi, sondaı-aq «Mersedes» kóliginiń júrgizýshisi apattyń saldarynan alǵan kóptegen jaraqattarmen 7-shi qalalyq klınıkalyq aýrýhanaǵa jetkizildi.
«Jedel-izdestirý toby jol-kólik apatynan keıin izin sýytqan Almaty qalasynda turatyn, 1987 jylǵy A., esimdi azamattyń izine tústi. Ol ýaqytsha oqshaýlaý abaqtysyna toǵytyldy», - dedi polıtsııa polkovnıgi R. Ahmetqazın.
