Almatynyń jol polıtseıleri endi hattamany planshetpen toltyrady - Baýyrjan Baıbek
Almatyda Táýelsizdik kúnine arnalǵan saltanatty jıynda Baýyrjan Baıbek Memleket basshysynyń «Tsıfrly Qazaqstandy» qurý tapsyrmasyna oraı qazirgi kezde júzege asyrylyp jatqan «Smart Almaty» ınnovatsııalyq qala jobasyn qalyptastyrýǵa qatysty pikirin aıtty.
«Densaýlyq saqtaý, bilim berý, bıznes, qaýipsizdik jáne kólik sııaqty salalarǵa zamanaýı tehnologııalardy engizý azamattarǵa kezeksiz, ǵalamtor arqyly memlekettik qyzmetterdi paıdalanýǵa jol ashady. Memlekettik qyzmet kórsetý ýaqyty únemdelip, qyzmet túri ashyq bolady, sybaılas jemqorlyq faktory joıylady», - dedi Baýyrjan Baıbek.
Almaty ákimi búginde jol qyzmetkerleri men avtokólikterdiń beıne tirkeý jáne GPS qurylǵylarmen qamtylǵanyn aıtty.
«Eger ınspektorlar belgilengen baǵyttan shyǵatyn nemese beınetirkegishti óshiretin bolsa, onda qyzmetten bosatylady. Jol polıtsııasy ákimshilik quqyq buzýshylyq týraly hattamany elektrondy toltyrýǵa kóshti. Bul osy saladaǵy jemqorlyqtyń beleń alýyna tosqaýyl qoıyp, aıyppuldy sol jerde tóleýge múmkindik beredi. Qazirdiń ózinde polıtsııa qyzmetkerleri 200-den astam planshetpen qamtylǵan, kelesi jyly olar planshetpen 100% jabdyqtalatyn bolady», - dedi B.Baıbek.
Shahar basshysy «bir tereze» qaǵıdasymen memlekettik qyzmet kórsetetin «Open Almaty» qoǵamdyq qabyldaý ortalyǵy týraly sóz qozǵady.
«Bul ortalyq Ońtústik-Shyǵys Eýropa elderiniń arasynda halyqqa qyzmet kórsetýdegi ınnovatsııalyq joba retinde 2-shi oryndy ıelendi. Ortalyq azamattarǵa sabylyp qala kezbeı, memlekettik qyzmetti bir jerden alýǵa múmkindik beredi. Qoǵamdyq qabyldaý halyqqa yńǵaıly bolý úshin qala ortalyǵynda - «Almaty Towers» ǵımaratynda ornalasqan. Munda qalanyń barlyq aýdandyq ákimdikteriniń, bes negizgi basqarmalardyń, alty ortalyq memlekettik organnyń, «Atameken» UKP-nyń ókilderi men medıatorlar jumys isteıdi. Shaǵymdar telefon jáne Internet arqyly onlaın qabyldanady. Ashylǵanyna nebári 3 aı bolǵan Ortalyqqa 4 myńǵa jýyq ótinish túsken», - dedi ol.