Almatynyń Jetisý aýdany qalaı damyp jatyr
ALMATY. QazAqparat – Jetisý aýdanynda áleýmettik ınfraqurylymdy damytý máseleleri qalaı sheshilip jatqany týraly aýdan ákimi Gúlnar Kókebaeva aıtyp berdi, dep habarlaıdy QazAqparat tilshisi.
Búgin Jetisý aýdanynyń ákimi Gúlnar Kókebaeva esep berý jıynynda ótken jyldy qorytyndylap, 2021 jylǵa arnalǵan josparlar týraly aıtty.
Jetisý aýdanynda kópbalaly otbasylardan shyqqan balalardy jáne áleýmettik osal toptartardy qoldaý maqsatynda «Shyńǵa órleý», «Dombyra mektebi» jáne basqa da áleýmettik klýbtar jumys isteıdi. Aýdannyń bes jerinde 7-12 jas aralyǵyndaǵy balalarǵa arnalǵan tegin fýtbol, voleıbol sektsııalary ashyldy. Sektsııalar aýdannyń 300-den astam balalaryn qamtydy.
Bıyl «Qulager», «Aınabulaq» jáne «Kemel» shaǵyn aýdandarynda jańa 3 sport kesheni ashylady. Qurylys jumystary jyl sońyna deıin aıaqtalady.
Sonymen qatar, jasóspirimder sportyn qoldaý úshin birinshi jartyjyldyqta «Qulager», «Kókjıek», «Kókmaısa» shaǵyn aýdandarynda ashyq dalada ornalasqan 3 jekpe-jek ortalyǵy paıdalanýǵa beriledi. «Kókmaısa» shaǵyn aýdanynda balalar shyǵarmashylyq ortalyǵyn ashý josparda.
Kezdesý barysynda ákim jumyspen qamtý máselesi kásipkerlik sektordy damytý esebinen sheshiletinin atap ótti. «Rahat kz», «Alataý» bazarlaryn jańǵyrtý jáne «Keremet» saýda úıin salý aıasynda 1250 jumys ornyn qurý kózdelgen. Bıyl «Vıraj» avtosalonynyń qurylysy aıaqtalǵannan keıin 150 jumys orny ashylady.
Gúlnár Kókebaeva Jetisý aýdanynyń turǵyndaryn áleýmettik sala máseleleri tolǵandyratynyn aıtty.
«Oqýshy oryndarynyń jetispeýshiligin sheshý úshin aýdanda jumys istep turǵan mektepterge japsarjaı qurylysy, bilim berý mekemelerine kúrdeli jóndeý júrgizilýde.Osylaısha, bıylǵy jyly №57, 102, 177 mektepterde 1050 jańa oqýshy ornyna arnalǵan qosymsha qurylys jumystary aıaqtalady. Sonymen qatar, 850 oqýshyǵa arnalǵan №112, 148, 103 mektepterge qosymsha taǵy úsh japsarlas qurylys bastalady. Sondaı-aq, bıyl biz «Aınabulaq-4» shaǵyn aýdanynda 160 oryndyq jańa balabaqsha salýdy bastaımyz», - dedi aýdan ákimi.
2019 jyldan bastap aýdanda «Baqytty otbasy» áleýmettik ortalyǵy jumys isteıdi, «Isker Ana» baǵdarlamasy iske asyrylýda. 2020 jyly atalǵan ortalyqta 1116 adam tirkelgen. 26 000 qyzmet kórsetildi. 345 kópbalaly ana túrli kýrstar men trenıngterden oqýdan ótti. Aýdanda barlyǵy 1 969 kópbalaly otbasy bar. 682 Ataýly áleýmettik kómek aldy.
Aýdan turǵyndaryn qoljetimdi medıtsınalyq qyzmetpen qamtamasyz etý úshin «Kemel» shaǵyn aýdanynda jańa ambýlatorııa jáne «Jumysshy» kentinde áıelder konsýltatsııasymen, kúnine 240 kelýshige arnalǵan emhana salý josparda. Sondaı-aq, №11 emhanaǵa kúrdeli jóndeý júrgiziledi.
Jol ınfraqurylymy máselelerin sheshý maqsatynda uzyndyǵy 18 shaqyrym bolatyn 10 kóshege jóndeý jumystary júrgiziledi. 8 shaqyrymǵa káriz jelileri salynady jáne 29,3 shaqyrym sýmen jabdyqtaý jelileri qaıta jańartylady.
«Jaryqtandyrýǵa keler bolsaq, ótken jyly 84 kóshege jaryq júrgizildi. Bıyl aýdandaǵy barlyq kóshelerdi jaryqtandyramyz. Sonymen qatar, «Jumysshy» kentindegi úılerdi sý basý máselesin sheshý úshin bıyl 4 shaqyrym aryq jelisine jóndeý júrgiziledi. Jobalyq-smetalyq qujattamany ázirlegennen keıin uzyndyǵy 37,5 km aryqtardy salý jáne rekonstrýktsııalaý boıynsha jumystardy bastaý josparlanýda»,-dedi Gúlnar Kókebaeva.
«Bıýdjetke qatysý» jobasy aıasynda 19 joba iske asyrylady: Seıfýllın dańǵylyndaǵy 2 kópirdi jańartý, aýdannyń 4 zıratyn abattandyrý, aýlalardy jóndeý jáne «Qulager» shaǵyn aýdanynda skeıt park qurý.
Ótken jyly osy joba boıynsha «Aınabulaq», «Kókjıek», «Qulager» shaǵyn aýdandarynda gúlzarlar men jalpy aýdany 58 ga. jaıaý júrginshiler aımaǵyna aǵymdaǵy jáne kúrdeli jóndeý jumystary júrgizildi.
«Turǵyndardy tolǵandyratyn máselelerdiń biri - eski turǵyn úı. Bul másele sheshile bastady. Krylov-Skrıabın-Goncharov kósheleri men Raıymbek dańǵylynyń boıynda qurylys jumystary bastaldy. Buzylǵan 16 úıdiń ornyna 11 kóptáreli úı ( 944 páter salynady). Aıaqtaýdyń josparlanǵan merzimi-2022 jyldyń jeltoqsany», - dedi G.Kókebaeva.
Bıyl Kazakov, Skrıabın, Botkın kósheleri men Raıymbek dańǵylynyń boıyndaǵy eski úılerdi buzý jumystary bastalady, aıaqtalýy – 2024 jyl. 119 páterden turatyn 14 úıdiń ornyna 767 páterlik 13 úıdiń qurylysy josparlanǵan.
«Eski úılerden basqa, aýdanda 5 apatty úı bar, olardyń turǵyndaryn 2022 jyldyń basynda áleýmettik úılerge kóshiremiz»,- dedi ákim.
