Almatynyń jekemenshik úılerinde datchıkter ornatylyp jatyr
ALMATY. QazAqparat - Almaty Tótenshe jaǵdaılar departamenti búginde qaladaǵy 136 jekemenshik úıde kómirqyshqyl gazyn anyqtaıtyn dabyl qurylǵylaryn ornatty, dep habarlaıdy qalalyq TJD baspasóz qyzmetine silteme jasaǵan QazAqparat tilshisi.
Almaty qalasy TJD málimetinshe, jylý maýsymy bastalǵannan beri «Árbir úıdiń qaýipsizdigi» aktsııasynyń aıasynda qala qutqarýshylary tańdaýly túrde (az qamtylǵan otbasylar men qarııalar) pesh jaǵatyn úılerde kómirqyshqyl gazyn anyqtap, dabyl beretin qurylǵylardy ornatty. Ýly zattardyń shekti kontsentratsııasy mólsherden asyp ketkende dabyl iske qosylyp, turǵyndardy qaýipti jaǵdaı týraly belgi beredi.
Búginde osyndaı qurylǵylar qaladaǵy 136 úıde ornatylǵan.
9 aqpanynda Almaty garnızonynyń jeke quramy jergilikti polıtsııa qyzmeti, aýdan ákimdikteri, «Nur Otan» partııasynyń ókilderi jáne QR Qyzyl Jarty aı qoǵamynyń eriktilerimen birlesip 8 364 úıdi tekserip, órt qaýipsizdigin saqtaý týraly 10 myńnan astam jadynama taratqan. 
Jalpy, departament jekemenshik turǵyn sektorynda ornalasqan 145 myńnan astam turǵyn úıdi esepke aldy. Jylý maýsymynyń bastalýyna deıin bir aı ýaqyt qalǵanda, departamenttik jeke quramy barlyq úılerdi aralap shyqty. Jazataıym oqıa bolǵan 20 myńnan astam úıler birneshe ret tekserildi. Úı ıelerine órt qaýipsizdigi erejelerin saqtaý týraly jadynamalar berilip, sondaı-aq 8395 adamdy qamtyǵan 486 jınalys ótkizildi.
Avtor: Gúlzat Sahova
