Almatynyń jedel járdem qyzmeti kúzgi kezeńge daıyndalyp jatyr
ALMATY. QazAqparat – Almaty qalasy ákiminiń orynbasary Erjan Babaqumarov pen Qoǵamdyq densaýlyq basqarmasynyń basshysy Kamaljan Nadyrov megopolıstegi jedel járdem qyzmetiniń jumysymen tanysyp, kúzgi kezeńge daıyndyǵyn baǵalady, dep habarlaıdy QazAqparat tilshisi.
Erjan Babaqumarov JMKQ aqparattyq-jedel dıspetcherlik bóliminiń jumysymen tanysty. Almaty qalalyq Jedel medıtsınalyq járdem qyzmetiniń bas dárigeri Birjan Ospanov barlyq qyzmetkerler koronavırýs ınfektsııasynyń qaıta órshýine daıyn ekenin atap ótti.
«Qazirgi ýaqytta bizde 11 qosalqy stantsııada 180 brıgada jumys isteıdi. Bul 3 myńnan astam qyzmetker – dárigerler, feldsherler men júrgizýshiler. Barlyq mamandar jeke qorǵanys quraldarymen qamtamasyz etilgen. Koronavırýstyń jańa tolqyny bastalsa, biz 103 jelisiniń sanyn 30-dan 50-ge deıin, qońyraýlardy qabyldaý jáne berý boıynsha feldsherlerdiń sanyn 12-den 22-ge deıin, al brıgadalardyń sanyn 220-ǵa deıin kóbeıtemiz»,– dedi Birjan Ospanov.
Sonymen qatar, ol feldsherler sany taǵy 120 qyzmetkerge kóbeıetinin jetkizdi.
«Jedel járdem vagondaryn dezınfektsııalyq óńdeýge ýaqytty únemdeý úshin biz zamanaýı tehnologııalardy, atap aıtqanda bý generatoryn qoldanamyz. Osylaısha, Almaty qalasynyń Jedel medıtsınalyq járdem qyzmeti dárigerlerdiń jumysyn tıisti deńgeıde qoldaıtyn barlyq negizgi pýnktter boıynsha daıyn»,– deıdi ol.
Qazirgi ýaqytta 3000-505 Sall-ortalyǵy qala turǵyndarynyń suraqtaryna jaýap beredi.
«Jedel bólim shaqyrýlardy qabyldap, brıgadalardy shuǵyl medıtsınalyq kómekke muqtaj patsıentterge jiberedi. Osylaısha, biz 103 jelisinniń júktemesin kóbeıtpeı, jedel qońyraýlarǵa ýaqytynda jaýap bere alamyz. Dıspetcherler shaqyrýlardy qosalqy stantsııalar boıynsha bóledi jáne naýqastarǵa shaqyrý ornyna jaqyn brıgadany jiberedi. Qazir COVID-19 boıynsha ótinishter sanynyń qysqarǵany baıqalady», - dep atap ótti Almaty qalalyq Jedel medıtsınalyq járdem qyzmetiniń bas dárigeri Birjan Ospanov.
