Almatynyń jasy 1000 jyldan asady - tarıhshy-arheolog ǵalymdar
ATY. 17 qarasha. QazAqparat /Erbol Azanbek/ - Almatynyń jasy myń jyldan asady. Onyń tarıhynyń Vernyı qamalynan bastalyp, jasy 150 jylǵa jýyq delinip júrgen qazirgi pikirler qate.
Bul týraly búgin Almatyda bastalǵan «Eýrazııanyń ejelgi jáne ortaǵasyrlyq kenttenýi: Almaty qalasynyń qalyptasýy, damýy jáne jasy» atty halyqaralyq ǵylymı konferentsııa barysynda elimizdiń jetekshi tarıhshy ǵalymdary aıtty.
Akademık Karl Baıpaqovtyń paıymdaýynsha, Almatynyń jasyn Vernyıdan bastaý shyn máninde qatelik. Óıtkeni ejelgi Vernyı turǵyndarynyń ózi qalanyń bos dalada turǵyzylmaǵandaryn aıtqany týraly derekter Shoqan Ýálıhanovtyń, reseılik ǵalym Bartoldiń, birqatar keńestik ǵalymdardyń eńbekterinde kórinis tapqan. Bunymen qatar Babyr pen Muhammed Haıdar Dýlatıdiń eńbekterinde Almaty týraly jazbalar kezdesedi.
«Jalpy qala jasyn anyqtaýda arheologııanyń róli úlken. Buǵan deıin Almatynyń aýmaǵyna birneshe arheologııalyq zertteý júrgizilgen bolatyn. Onyń nátıjesinde birneshe qalashyqtardyń orny tabyldy. Qazbalardyń birinde qala aýmaǵynan tabylǵan kúmis tıyn 1271-1272 jyldary jasalǵan. Bul Almatynyń jasyna taǵy bir jańa kózqaras týyndatady. Basqa da aıǵaqtarǵa súıensek, ásem qalamyzdyń 13 ǵasyrdan bastap Almaty dep atala bastaǵanyn jáne tarıhynyń 10-11 ǵasyrdan bastalatynyn baǵamdaýǵa bolady. Demek Almatynyń jasy myń jyldan asty dep aıtýǵa ábden bolady», - dedi K.Baıpaqov.
Ǵalymnyń aıtýynsha, Almaty qazirgideı árqashan saýda, saıası, ákimshilik ortalyq bolǵan.
Almatynyń jasy týraly máseleniń kópten beri qoǵamda pikirtalas týdyryp júrgeni belgili. Osyǵan núkte qoıýdy maqsat tutqan atalmysh konferentsııa erteń aıaqtalady. Konferentsııa qorytyndysy boıynsha ǵalymdar Almatynyń naqty jasyn jarııa etedi.
