Almatynyń «Jas qanat» shaǵynaýdanynda kópqabatty úılerdiń qurylysy bastaldy
ALMATY. QazAqparat- «Jas Qanat» shaǵynaýdanynda úsh myń páterge arnalǵan kópqabatty úılerdiń qurylysy bastalady. Bul týraly Almaty qalasy Jaıly qalalyq orta basqarmasynyń basshysy Sapar Nurashev onlaın brıfıngte málim etti, dep habarlaıdy QazAqparat tilshisi.
«2021 jyly Túrksib aýdanyndaǵy «Jas qanat» kentinde 2 730 páterdiń (142 myń m2) qurylysy bastaldy, onyń ishinde 1451 páter jalǵa beriletin, 1279 páter kredıttik turǵyn úı. Qoljetimdi turǵyn úı qurylysyna Bazıs jáne Kazak-stroı sııaqty iri kompanııalar tartyldy»,-dedi ol.
Memleket basshysynyń turǵyn úı qurylysynyń qarqynyn arttyrý jónindegi tapsyrmasyna sáıkes 2020 jyly jalpy quny 66,5 mlrd teńge bolatyn 5 206 páter (294 myń m2) salynǵan, bul 828 jalǵa beriletin jáne 4 378 kredıttik turǵyn úı páteri.
«2020 jyly «Nurly jer» memlekettik baǵdarlamasy sheńberinde kommertsııalyq turǵyn úı qurylysyn yntalandyrý úshin respýblıkalyq bıýdjet qarajatynan 222 kóppáterli turǵyn úıge ınjenerlik-kommýnıkatsııalyq jeliler tartyldy – bul shaǵyn aýdandaǵy turǵyn úı keshenderi – «Shuǵyla», «Aqbulaq», «Vostochka», «Alǵabas» jáne «Jas qanat». Nátıjesinde 16 myńnan astam páter salyndy, onyń bir bóligi (50%) memlekettik baǵdarlamalar boıynsha iske asyryldy»,-dedi Sapar Nurashev.
Sondaı-aq ol bul baǵyttaǵy jumystar osy jyly da jalǵasatynyn aıtty. Búgingi tańda 227 turǵyn úıge ınjenerlik jeliler tartylyp jatyr.
«Sonymen qatar, turǵyn úı sektorynyń qurylysymen birge bilim berý jáne densaýlyq saqtaýdyń áleýmettik nysandaryn keshendi damytý júrgizilýde. Qurylys salýshylar óz ýchaskelerinde mektepter, balabaqshalar men medıtsınalyq mekemeler salýdy kózdeıdi. Keıinnen bul nysandar qalanyń kommýnaldyq menshigine beriletin bolady, tıisti tetik pysyqtalýda»,-dedi spıker.
