Almatynyń «Jas qanat» shaǵynaýdanynda 5 kópqabatty úı paıdalanýǵa beriledi

ALMATY. QazAqparat – Almaty qalasy Túrksib aýdanyndaǵy «Jas-Qanat» shaǵyn aýdanynda aýdany 163 098 sharshy metr 3116 páterlik 41 úıdiń qurylys-montajdaý jumystary júrgizilip jatyr, dep habarlaıdy QazAqparat tilshisi.

Qala ákimdiginen málim etkendeı, búgingi kúni 31 úı nemese aýdany 122 859 sharshy metr 2 344 páter paıdalanýǵa berildi. 2023 jyldyń sońyna deıin taǵy 5 kópqabatty úı nemese 473 páter qoldanysqa berý josparlanǵan. Sonymen qatar salynyp jatqan úılerge irgeles aýlalardy abattandyrý jumystary júrgizilip jatyr.

«Jobasy aıasynda 12 aýlany abattandyrý kózdelgen. Abattandyrý nysandary 60%-ǵa daıyn. Búginde 8 aýla boıynsha jumystar júrgizilip jatyr, aýlalardy asfalttaý jáne shaǵyn sáýlet nysandary ornatyldy. Bıyl 10 qyrkúıekke deıin qalǵan jáne shaǵyn sáýlet nysandary ornatý jáne kógaldandyrý jumystary bitedi. Qalǵan 4 aýla boıynsha jumys 15 qyrkúıekte bastalyp, 2023 jyldyń qarashasynda aıaqtalady. Merdiger uıymǵa jumys qarqynyn jedeldetý tapsyryldy», - dep atap ótti Almaty qalasy ákimdiginen.

Aıta keteıik, úıler 2022 jyldyń jeltoqsanynda paıdalanýǵa berilýge tıis edi. Jumystardyń sapasyz oryndalýyna baılanysty tapsyrý merziminiń edáýir keshiktirilýine ákelgen «Rıgolıt» JShS, «Kapıtalproekt Grýpp» JShS, «Hadıt» JShS, «Promkomplekt» JShS, «Shah» JShS jáne «NVK-Sapa Qurylys» JShS merdigerlik uıymdaryn memlekettik satyp alýǵa jaýapsyz qatysýshy dep taný týraly talap aryzdar berildi.

Qazir sot júrip jatyr.