Almatynyń jańa bas jospary qashan bekitiletini belgili boldy
ALMATY. QazAqparat - Almaty qalalyq Sáýlet jáne qala qurylysy basshysynyń jetekshisi Almashan Ahmedjanov qalanyń jańa bas jospary qashan bekitiletinin málim etti, dep habarlaıdy QazAqparat tilshisi.
Qalalyq Sáýlet basqarmasynyń ókilderi Qoǵamdyq keńestiń ınnovatsııa, ınvestıtsııa, memlekettik-jekeshelik áriptestik pen turǵyn úı kommýnaldyq sharýashylyq máseleleri boıynsha otyrysynda Bas jospardyń nege qabyldanbaı jatqany týraly aıtty.
Basqarma basshysynyń aıtýynsha, olar Seısmologııa ınstıtýtynyń kartasyn kútip otyr.
«Seısmologııa ınstıtýtymen jumys júrgizilip jatyr. Olar qarasha aıynda aýdandardyń seısmıkalyq kartasyn ázirleýi tıis bolǵan. Olardyń basshylarymen tildesken kezde qarashada bitedi degen bolatyn. Alaıda sonda da kepildik joq. Karta daıyn bolsa, jańa málimetterdi eskere otyryp qujattardy bekitý boıynsha jumystardy jalǵastyramyz. 2018 naýryzda negizgi protsedýralardy bitirýdi kózdep otyrmyz», - dedi basqarma basshysynyń orynbasary Almashan Ahmedjanov.
Qoǵamdyq keńes músheleri basqarma ókilderine qala turǵyndarynyń aryzyn jetkizdi. Atap aıtqanda turǵyndar Shevchenko men Qurmanǵazy kóshelerin bir baǵytty etkende keptelis azaımaǵanyn aıtyp shaǵymdanǵan.
Basqarma basshysynyń orynbasary qaladaǵy kólik, sáýlet, tabıǵatty qorǵaý saıasatymen túrli ınstıtýttar aınalysyp kelgendigin alǵa tartty.
«20 qyrkúıekte Memleket basshysy «Almaty bas jospary» ǴZI qaıta ashýǵa tapsyrma bergen bolatyn. Qazir ınstıtýt ádilet organdarynda tirkelip jatyr. Shevchenko kóshesiniń keptelisine kelsek, bul jerde shaǵyn ǵana jol ýchaskesi qarastyrylyp jatyr. Al Almaty bas jospary ǴZI bul máseleni tutas qala kóleminde qaraıtyn bolady», - dedi A. Ahmedjanov.
Aıta ketý kerek, 2030 jylǵa deıingi Almaty qalasynyń bas josparynyń jobasyn qalalyq sáýlet jáne qurylys basqarmasynyń tapsyrmasymen «Almatygıprogor-1» JShS jasady. Bas jospardy túzetken avtor - Altaı Satybaldın.
Budan biraz aı buryn Altaı Satybaldın QazAqparat tilshisine jobanyń mán-jaıynan habardar etken bolatyn.
Alaıda ol qujattyń qashan bekitiletinin aıtpady. Qazir qalada 2002 jylǵa deıingi bas jospar boıynsha jumys istelip jatyr.
