Almatynyń úzdik muǵalimine avtokólik kilti tabystaldy
ALMATY. QazAqparat - Almatyda orta bilim beretin mekemelerdiń 100-den astam muǵalimi arasynda ótken «Ustaz Mártebesi - Ult Mereıi» qalalyq konkýrsynyń qorytyndysy shyqty, dep habarlaıdy QazAqparat tilshisi.
Baıqaý nátıjesinde 100 muǵalimniń ishinen №159 mekteptiń qazaq tili men ádebıeti pániniń muǵalimi Sáýle Ahmetova top jardy. Ol Almatynyń «Úzdik muǵalimi» atandy.
Qala ákimi oǵan jańadan ashylǵan №168 mektepte saltanatty túrde avtomobıl kiltin tabystady.
Al №140 mekteptiń ınformatıka pániniń muǵalimi Nurǵaly Nurymbetovke otbasylyq demalystyń joldamasy berildi.
Bulardan ózge birqatar ustazdarǵa dıplomdar men 500 jáne 300 myń teńgelik sertıfıkattar tabys etildi. Ustazdar arasynda mundaı baıqaý ótkizýdi jergilikti kásipker Murat Ádilhanov usynǵan.
Ol «Týǵan jer» baǵdarlamasy aıasynda osy oqý mekemesin salyp bergen edi.
«Memleket basshysynyń qoldaýy arqasynda Almatyda 117 oqý orny salyndy. Tek sońǵy bes jyl ishinde ǵana bilim salasyn qarjylandyrý megapolıste 37%-ǵa nemese 27 mlrd teńgege ósti. Qazirgi kezde bilim salasynyń ınfraqurylymyn damytýǵa erekshe nazar aýdarylyp keledi. Tek bıyldyń ózinde ǵana qurylys pen kúrdeli jóndeý jumystaryna 17 mlrd teńgeden astam qarjy bólindi. Men sizderge barynsha jaýapty ári qıyn jumystaryńyz úshin alǵys aıtamyn. Ustazdardyń jumys sapasy oqýshylarynyń túrli baıqaýlarda jeńimpaz atanýymen jáne ózderińizdiń jeke kásibı biliktilikterińizben aıqyndalady», - dedi Almaty ákimi Baýyrjan Baıbek.
Aıta ketý kerke, Memleket basshysynyń Joldaýyn júzege asyrý barysynda bıýdjet qarjysy esebinen qalada taǵy da 8 jańa mektep salynady.
Jyl basynan beri jańarǵan ádispen dáris berýge kóshken Almaty muǵalimderiniń 70%-ynyń jalaqysy 30%-ǵa ósti. Ulttyq testileýden ótken 1293 muǵalim 1 qyrkúıekten bastap alǵash ret ózderiniń qyzmettik jalaqysyna 30-50%-ǵa deıin qosymsha ústeme alatyn bolady.
Budan ózge, memleket aǵylshyn tilinde sabaq beretin muǵalimderge qoldaý kórsetýde. Bıyl mine, ekinshi jyl fızıka, hımııa, bıologııa, ınformatıka pánderin aǵylshyn tilinde oqytatyn ustazdarǵa ózderiniń qyzmettik jalaqysynyń ústine 200%-dyq kólemde qosymsha aqy tólenedi.
