Almatynyń úzdik muǵalimderi páter, avtokólik jáne 1 mln teńge úshin baq synaıdy
Ákimdik taratqan aqparatqa sáıkes, baıqaýǵa 5 jyldan asa úzdiksiz eńbek ótili bar orta bilim berý uıymdarynyń muǵalimderi qatysyp jatyr. Mindetti shart – konkýrsqa qatysýshy muǵalim ózin usynǵan mektepte keminde 3 jyl jumys isteýi tıis.
Baıqaý úsh kezeńde mektepishilik, aýdandyq jáne qalalyq deńgeıde ótkiziledi.
«Jeńimpaz konkýrstyq komıssııanyń baǵalaýy jáne qoǵamdyq pikirdiń qosyndysy arqyly (respýblıkalyq telekanalda kórermenderdiń bergen daýystary) anyqtalady. Konkýrstyń mektepishilik kezeńine 205 mektepte 709 muǵalim qatysty. Ekinshi kezeńge árbir mektep 2 jeńimpazdan usyndy. Ekinshi kezeńge qatysqan muǵalimderdiń sany 410 boldy. Qalalyq kezeńge árbir aýdan úzdik 5 muǵalimnen usynady. Sonymen, Almatynyń úzdik jyl muǵalimi ataǵyna megapolıstiń 8 aýdanynan 40 muǵalim qatysady», - dedi qalalyq ákimdikten.
Konkýrstyq komıssııa pedagogıkalyq, psıhologııalyq jáne ádistemelik salanyń ǵalymdarynan, respýblıkalyq «Úzdik pedagog» konkýrstarynyń jeńimpazdarynan, ardager-ustazdardan, jańashyl-pedagogter, ádiskerlerden jáne qoǵamdyq uıymdardyń ókilderinen quryldy.
Konkýrstyń gran-Prı ıegerine «Almatynyń jyl muǵalimi» ataǵy beriledi. Gran-Prı – bir bólmeli páter, І oryn – avtomobıl, ІІ oryn – 2,5 mln teńge, ІІІ oryn – 1 mln teńge beriledi.
Konkýrstyń jeńimpazdary jyl saıynǵy «Muǵalimder kúni» merekesiniń saltanatynda marapattalady.
«Almaty qalasynyń bilim basqarmasy qala ákimi Baqytjan Saǵyntaevtyń tapsyrýymen jáne qoldaýymen orta bilim berý uıymdary muǵalimderine «Almatynyń jyl muǵalimi» ataǵyn berý úshin konkýrs ótkizip otyr. Bul konkýrs qoǵamda pedagog mártebesin kóterýge, kásibı jáne áleýmettik kelbetin qalyptastyrýǵa, talantty muǵalimderdi anyqtaý, olarǵa qoldaý kórsetý men marapattaýǵa, pedagogıkalyq shyǵarmashylyqqa yntalandyrýǵa baǵyttalǵan», - dedi Almaty qalasy bilim basqarmasynyń bilim berýdegi jańa tehnologııalardyń ǵylymı-ádistemelik ortalyǵynyń dırektory Andreı Dýpık.
