Almatynyń úsh aýdanynan 252,3 myń tekshe metrden astam tas aralasqan laı úıindileri shyǵaryldy

Bul týraly búgin QR ІІM TJ komıtetinen málimdedi.

Naýryzbaı aýdanynda turǵyn úıler men aýlalardy, kóshelerdi jáne nómiri №187-shi orta mektepti laı kóshkininen tazartý jalǵasýda. Sonymen qatar, sel tasqyny ótken Qaraǵaıly ózeniniń buzylǵan sý arnalaryn qalpyna keltirý jumystary da júrip jatyr. Respýblıkalyq shuǵyl-qutqarý otrıady men Almaty qalasynyń qutqarý qyzmeti birlesip, jalpy kólemi 130 tekshe metrden asatyn, qulaǵaly turǵan 104 aǵashty kesip, qala syrtyna shyǵardy.

Kommýnaldyq qyzmetter turǵyn úılerdi sýmen jáne gazben qamtamasyz etý jumystaryn jalǵastyrýda. Qazirgi tańda turǵyndarǵa 3980 tonna aýyz sý men turmystyq maqsatqa 1063 tonna tehnıkalyq sý jetkizildi.

«Qazseldenqorǵaý» memlekettik mekemesi bolsa, sel tasqynynan qorǵaýǵa arnalǵan qurylymdardyń sý taratqysh arnalaryn tazartyp jatyr. Sondaı-aq, sýdyń Qaraǵaıly ózeniniń boıymen aǵý barysyna turaqty túrde monıtorıng júrgizilýde.

Búgingi tańda QR ІІM TJ komıtetiniń aýmaqtyq bólimsheleri, Respýblıkalyq jedel-qutqarý jasaqtary, Apat medıtsınasy ortalyǵy, «Qazseldenqorǵaý» MM, «Qazavıaqutqarý» AQ, QR ІІM Ulttyq ulany jáne basqa da qalalyq qyzmetter tarapynan barlyǵy 1281 adam men 248 tehnıka sel saldaryn joıý jumystaryna jumyldyrylǵan.