Almatynyń úsh aýdanyna 30 shaqyrymdyq gaz qubyry tartylady
ALMATY. Mamyrdyń 31-i. QazAqparat /Erbol Azanbek/ - Bıylǵy jyly Almatyda memlekettik bıýdjet esebinen 30 shaqyrymdyq gaz qubyry tartylady. Bul týraly búgin Almatyda ótken baspasóz máslıhatynda málim boldy,
dep habarlaıdy QazAqparat.
Buǵan deıin habarlanǵandaı, qala ákimi Ahmetjan Esimov ekologııalyq ahýaldy jaqsartý maqsatynda aldaǵy 3 jylda qalany gaz otynyna qosý týraly tapsyrma bergen bolatyn. Osyǵan sáıkes, júzege asyrylatyn gazdandyrý bıyl Jetisý, Áýezov, Túrksib aýdandarynda júzege asyrylmaq. Sonymen qatar Almatynyń qoǵamdyq kóligin gazben júrgizý isi de qolǵa alyna bastamaq.
«Aldaǵy ýaqytta kommýnaldyq qoǵamdyq kólik parki ashylady. Oǵan jańa 200 avtobýs alý kózdelip otyr. Bul kólikterdiń barlyǵy gazben júretin bolady. Budan ózge jylý ortalyqtaryna (JES- 1, JES- 2) otyn retinde gazdy paıdalaný da qarastyrylýda. Oǵan deıin JES-1 men JES-3 - te zaıandy qaldyqtardy súzetin quraldar ornatylyp, aýanyń lastanýy azaıtylady. «Almaty elektr júıeleri» AQ-nyń kásiporyndary gazǵa kóshiriledi. Buǵan 2014 jyly iske qosylatyn «Beıneý-Shymkent» gaz jelisi yqpal etedi. Bul joba iske assa, zııandy zattar shyǵarý kólemi 15 paıyzǵa nemese jylyna 20 myń tonnaǵa azaıady», deıdi E.Shormanov.
Bunymen qatar bolashaqta energetıka jáne sýmen qamtamasyz etý salalarynda ekologııaǵa zalal keltirmeıtin sharalar júzege asyrylady. Bul rette energııa saqtaǵysh tehnologııalarǵa jiti nazar aýdrylmaq. 2009 jyldyń tájirıbesi kórsetkenindeı, osyndaı tehnologııany qoldaný qala ákimdiginiń ǵımaratynda elektrdi paıdalanýdy 38 paıyzǵa azaıtqan.
