Almatynyń Úlken aınalma avtomobıl jolyna kontsessıonerlerdi tańdaý baıqaýy 2012 jyly jarııalanady
ASTANA. 20 qazan. QazAqparat - Búgin QR Kólik jáne kommýnıkatsııa mınıstri Berik Kamalıev Almatynyń Úlken aınalma avtomobıl jolynyń (BAKAD) qurylys jobasyn iske asyrý máseleleri, onyń ishinde jer ýchaskelerin satyp alý barysy jóninde jınalys ótkizdi.
Bul aqparatty QR Kólik jáne kommýnıkatsııa mınıstrliginiń baspasóz qyzmeti taratyp otyr.
Jınalysty ashqan mınıstr bul jobany iske asyrý Elbasynyń turaqty nazarynda ekenin atap ótti. Aınalma joldyń qurylysy, aldymen, jergilikti halyq úshin, sonymen qatar qalaǵa baratyn kólik aǵynyn azaıtý jáne ekologııalyq jaǵdaıdy jaqsartý úshin qajet.
2007 jyly Almaty qalasynyń ákimdigi BAKAD qurylysyna tehnıkalyq-ekonomıkalyq negizdeme jasaǵan. Ótken jyly osy joldyń qurylysyna jobalyq-smetalyq qujattama jasaldy. Bul qujattamaǵa sáıkes jobanyń quny 79,5 mlrd.teńgeni qurady.
Joldyń uzaqtyǵy 70 shaqyrym, onyń 65 shaqyrymy - 6 jolaqty І A tehnıkalyq kategorııaǵa jáne 5 shaqyrymy-i - 4 jolaqty І B tehnıkalyq kategorııaǵa sáıkestendiriledi. Keleshektegi qozǵalys jıiligi táýligine 45 myń kólikti quraıtyn bolady.
Osy joba boıynsha 18,5 mlrd. teńgege 761 gektar jerdiń aýmaǵy alynýǵa jatady, onyń ishinde, 2007 jyly 3,7 mlrd. teńgege 119 gektar jer ýchaskeleri satyp alynǵan bolatyn.
Qazaqstan Respýblıkasynyń 2010-2014 jyldarǵa arnalǵan kólik ınfraqurylymyn damytý baǵdarlamasyna sáıkes atalǵan jobany 2012-2014 jyldary kontsessııalyq negizde júzege asyrý josparlanýda.
Qazirgi tańda QR Kólik jáne kommýnıkatsııa mınıstrligi Almaty oblystyq ákimdigimen birlesip, jerlerdi baǵalaý men satyp alýǵa kiristi. Sonymen qatar, mınıstrlik atalǵan jobaǵa ARÝP konsortsıýmyn konsýltant retinde tartýdy usyndy. Eýrazııalyq qaıta qurý jáne damý banki (EBRR) bul usynysty qoldady. Atalǵan jobaǵa kontsessıonerlerdi tańdaý boıynsha baıqaý 2012 jyly jarııalanady.
