Almatynyń Túrksib aýdanynda 4 myń jańa jumys orny ashyldy

ALMATY. QazAqparat – Almaty qalasy ákimdiginiń baspasóz ortalyǵynda Túrksib aýdanynyń ákimi Baqytjan Aqjarov 2019 jyly aýdannyń áleýmettik-ekonomıkalyq damýyn qorytyndylap, ınvestıtsııalyq jobalardy júzege asyrý aıasynda qurylǵan jańa jumys oryndary týraly aıtty, dep habarlaıdy QazAqparat tilshisi.

Túrksib aýdany ákiminiń málimetinshe, aýdan aýmaǵynda 500-den astam óndiris oryny jumys isteıdi, onda 10 myńǵa jýyq adam eńbek etedi. Aýdanda shyǵarylatyn ónim kólemi 25%-ǵa ósken. Eger 2018 jyly shyǵarylǵan ónim kólemi 156,5 mlrd teńgeni qurasa, 2019 jyly bul kórsetkish 194,4 mlrd teńgege jetti.

«Investıtsııa 32%-ǵa artty. Onyń 80%-dan astamy jeke ınvestıtsııa, bul aýdan ekonomıkasynyń turaqtylyǵyn kórsetedi. Atalǵan ınvestıtsııalar esebinen kompanııalar jańa tseh, jańa óndiris jelisin, jumys ornyn ashty. Ótken jyly 4 myńǵa jýyq jańa jumys orny quryldy», – dedi aýdan basshysy.

B. Aqjarovtyń aıtýynsha, jeke ınvestıtsııalardyń basym bóligi iri kásiporyndarǵa tıesili. 2019 jyly shaǵyn jáne orta bıznes sany 5%-ǵa, 6 997 kompanııaǵa deıin ósti. Osy sektorda búgingi kúni 46 myńnan astam adam jumyspen qamtylǵan.

«Shaǵyn jáne orta bıznesti qoldaý boıynsha belsendi jumys júrgizilýde. Aýdandyq halyqqa qyzmet kórsetý ortalyǵynda «Qolday» kásipkerlik ortalyǵy ashyldy, onda ótken jyldyń sońynan bastap myńnan astam adam bıznesti ashý, júrgizý jáne sharttar men sharalar, shaǵyn kásipkerlikti qoldaýdyń memlekettik baǵdarlamalary boıynsha keńes aldy», – dep atap ótti B. Aqjarov.

Foto: inbusiness.kz