Almatynyń Túrksib aýdanynda 2 úlken saıabaq salynyp jatyr

ALMATY. QazAqparat – Túrksib aýdanynda turý jaılylyǵyn jaqsartý úshin saıabaqtar men skverlerdiń qoljetimdiligin qamtamasyz etý jumystary jalǵasyp jatyr. Bul týraly qala ákimi Erbolat Dosaev aıtty, dep habarlaıdy QazAqparat tilshisi.

«Aýdany 46 gektardan asatyn 2 aýqymdy parktiń qurylysy júrip jatyr. Áýejaı aýdanynda ashylatyn «Aspan» parkiniń aýmaǵy – 15 ga. Sonymen qatar, Maıak toǵaıy abattandyrylyp jatyr. Ol – 31 ga. Nysandar jeltoqsan aıynda paıdalanýǵa beriledi», - dedi Erbolat Dosaev turǵyndarmen kezdesýde.

Sonymen qatar, turǵyndardyń usynysy boıynsha shilde aıynan bastap «Áýejaı dańqy» skveri jáne №6 oqýshylar úıiniń janyndaǵy gúlzar abattandyrylyp jatqanyn atap ótti.

«Onda syrtqy jaryq jelilerin, jasyl aımaqtardy sýarý júıesin, oryndyqtar, qoqys jáshikterin ornatý kózdelgen. Jumys 2023 jyldyń II toqsanynda aıaqtalady», - dedi qala basshysy.