Almatynyń Túrksib aýdany turǵyndarynyń sýsyz otyrǵanyna eki kún boldy
ALMATY. QazAqparat- Túrksib aýdanynda iri sý qubyry boıynda bolǵan apatty joıý jumystary áli de jalǵasýda, dep habarlaıdy QazAqparat tilshisi.
T.Rysqulov dańǵyly men Gertsen kóshesi qıylysynyń batys jaǵy kólikter úshin ýaqytsha jabyq.
«Súıinbaı-Baıanaýyl- Shemıakın-Hmelnıtskıı, Rysqulov-Parkovaıa-Qulynshaq-Baıshev, Aısha bıbi kósheleri men «Atyraý», «Shýaqty» shaǵyn aýdanynda ornalasqan ákimshilik ǵımarattar men turǵyn úılerge sý berý ýaqytsha shekteledi. Atalǵan mekenjaılar men shaǵyn aýdandarǵa avtotsısternalarmen sý tasymaldaý júzege asyrylady»,- dep habarlady qalalyq ákimdikten.
«Almaty Sý» MKK apattyq brıgadalary Gertsen kóshesi boıymen tartylǵan D=500 mm magıstraldy sý qubyryn qalpyna keltirý jumystaryn jalǵastyrýda. Oǵan 16 tehnıka jumyldyryldy.
Gertsen kóshesi arqyly ótetin magıstraldy sý qubyry 1962 jyly paıdalanýǵa berilip, qalany sýmen qamtamasyz etý maqsatynda 60 jyl jumys istep tozyǵy jetken.
«Almaty qalasynyń qoldanystaǵy ınjenerlik ınfraqurylymynyń jelileri ǵana emes,sonymen qatar obektiler jabdyqtarynyń da aıtarlyqtaı tozyǵy jetken. Sýmen jabdyqtaý jelileriniń uzyndyǵy 3528 shaqyrym. Onyń 1941,2 km jeli aýystyrýdy qajet etedi»,- dep atap ótti ákimdik ókilderi.
Aıta keteıik, Túrksib aýdanyndaǵy sýyq sý jelilerindegi apatty joıý jumystary 21 sáýir kúni bastalǵan boltyn.