Almatynyń taýly jerlerinde qurylys salýǵa tyıym salynady

ALMATY. QazAqparat - Almatyda Medeý aýdanynyń turǵyndary qala ákimimen kezdesý barysynda taý baýraıynda úı qurylysy qarqyndy júrip, alma baqtary kesilip jatqanyn aıtty. Olardyń pikirinshe, munyń arty tabıǵı apatqa ákelýi múmkin, dep habarlaıdy QazAqparat tilshisi.

«Taý baýraıyndaǵy qurylys máseleleri boıynsha biz dúısenbi kúni máslıhattyń sessııasyn ótkizemiz. Sol kezde qurylys erejeleri týraly sheshim qabyldanady. Eń bastysy, taý bókterinde qurylys salýǵa tyıym salynady», - dep jaýap berdi Almaty ákimi Erbolat Dosaev.

«Kamenskaıa plata» yqshamaýdanynyń turǵyndary baý-baqsha egý aýmaǵyn qaıtarýdy, sondaı-aq zańsyz berilgen jer telimderin qaıta rásimdeý jumystaryn júrgizýdi surady.

«Bul másele óte kúrdeli jáne ony sheshý múmkin emes. Jerge menshik quqyǵy týraly aktilerdiń barlyǵy bizge aýmaqty qosyp alǵan kezde negizinen Talǵar aýdanynan berildi. Olardyń tıisti zańdy kúshi bar. Bul máseleni tolyǵymen sheshe almaımyz. Bul Talǵar aýdanyna ǵana qatysty emes, Naýryzbaı men Alataýǵa qosylǵan jańa aımaqtar bar. Árkimniń isi bar. Olar qalanyń bir bóligine aınaldy. Keleńsiz jaǵdaı bolmas úshin tıisti jumystar júrgiziletin bolady», - dedi ákim.