Almatynyń taýdaǵy jolynda jaryq paıda boldy
ALMATY. QazAqparat - Almatynyń Bostandyq aýdanyndaǵy jolda jaryq paıda boldy, dep habarlaıdy «QazAqparat» HAA tilshisi «Qazseldenqorǵaý» MM AQPB-ǵa silteme jasap.
«Almaty qalalyq TJD-dan Bostandyq aýdany Remızovka kentiniń №400 ýchaskesinde jaryqtyń paıda bolǵany týraly aqparat kelip tústi. «Qazseldenqorǵaý» MM AQPB mamandary tekserý barysynda anyqtaǵandaı, №400 ýchaskesi tusyndaǵy jolda uzyndyǵy 10 metrlik jaryq paıda bolǵan», - delingen «Qazseldenqorǵaý» saıtynda.
Qatty jańbyr jaýǵanda topyraq kóshkini bolýy múmkin ekendigi atalyp ótti. Avtokólik joly ashyq tur. Vedomstvo Bostandyq aýdanynyń ákimshiligine qatty nóser jaýǵanda avtokólik qozǵalysyn shekteýdi usyndy. Tótenshe jaǵdaıdyń aldyn alý úshin qaýip-qaterdi joıý sharalary júrgizilýi qajet.
Eske salaıyq, tolassyz jaýǵan jańbyr saldarynan Almatynyń birneshe aýdanynda úılerdi sý basyp, jaıaý júrginshiler kópirin jańbyr sýy shaıyp ketti.
