Almatynyń taý landshaftysy Beıjińdegiden ádemi - Bın Vý
ALMATY. QazAqparat - Qazaqstanǵa taý-shańǵy sportyn halyqqa barynsha qol jetimdi qylý úshin jarnamany kúsheıtý kerek. Almatyǵa qytaılyq shańǵyshylardy kóbirek tartý jaǵyn uıymdastyrýǵa bolady, dedi búgin Almatyda ótip jatqan taý-shańǵy sporty boıynsha halyqaralyq forýmda qysqy sport túrleri boıynsha Qytaı qaýymdastyǵynyń bas menedjeri, «Beijing Wanda Culture Industry Group» kompanııasynyń bas dırektorynyń orynbasary Bın Vý.
«Biz keshe Alataýdy tikushaqpen aralap shyqtyq. Óte ádemi. Sizderdiń taý landshaftaryńyz tamasha, bolashaǵy zor, ol bizdiń Beıjińdegiden ádemi. Tabıǵı shatqaldar kóztartady. Sizderge taý sportyn nasıhattaıtyn jarnamany kúsheıtý kerek», - dedi qytaılyq Bın Vý.
Ol taý-shańǵy sporty boıynsha Qazaqstanmen qarym-qatynasty barynsha kúsheıtýge yntaly ekenin aıtty.
«Almatyǵa qytaılyq shańǵyshylardy kóbirek tartý jaǵyn uıymdastyrýǵa bolady. Almaty taýlaryn nasıhattaıtyn jarnamalar kóbirek kerek. Qalanyń taý-shańǵy sportyn damytý boıynsha halyqaralyq ortalyq qylýǵa bolady. Óıtkeni Almaty taýlary óte ádemi. Qytaımen Qazaqstandy salystyrýǵa kelmeıdi, bizdiń ishki naryǵymyzda tutynýshy kóp. Degenmen, sizder barynsha usynys jasasyńyzdar tutynýshy tartylady», - dedi qytaılyq sarapshy.
Aıta keteıik, búgin Almatyda taý týrızmin damytýǵa arnalǵan «International Mountain Sports Festival» festıvali aıasynda halyqaralyq forým ótti. Jıyndy resmı ashqan qala ákiminiń orynbasary Arman Qyryqbaev Almaty Qazaqstan ǵana emes, Ortalyq Azııa boıynsha taý-shańǵy sportynyń ortalyǵy bolýǵa yntaly ekenin aıtty.
Arman Qyryqbaev 2017 jyldyń birinshi toqsanynda megapolıske syrttan 200 myńnan astam adamnyń kelgenin, ótken jylmen salystyrǵanda qonaqtar sany 18%-ǵa artqanyn, sonyń ishinde 24%-dan kóbi sheteldik meımandar ekenin aıtty. Qonaqúılerde kórsetiletin qyzmet túri 18%-ǵa ulǵaıyp, 20 mlrd teńgeni quraǵan.
